Kryeministri i Maqedonisë së Veriut Zoran Zaev ka zhvilluar sot një vizitë zyrtare në Tiranë, ku është takuar me homologun Edi Rama.
Në konferencën e përbashkët për shtyp, Zaev është pyetur për një skenar të mundshëm maqedonas, për Shqipërinë. Kryeministri Zaev ka kujtuar trazirat në Maqedoni gjatë kohës kur ai ishte në opozitë, por tha se gjithmonë ka bërë maksimumin për integrimin e vendit.
Në këtë mënyrë, Zaev i ka dërguar një mesazh të qartë opozitës shqiptare, duke thënë se detyrimi i saj është të punojë për hapjen e negociatave me Bashkimin Europian, pavarësisht konflikteve të brendshme.
“Ne ishim opozitë para 21 muajsh në vendin tim. Kam nderin të jem kryeministri i vendit tim, por nuk është larg për të kujtuar se çfarë ndodhi dhe të bëjmë paralele me vendin tuaj. Ne jemi miq, por dua të them se në kohën kur isha në opozitë raportet e DASH dhe të BE-së flisnin për një regjim hibrid në Maqedoninë e Veriut, por kur flisja me Hahn si shef i opozitës, kur flisja me deputetët evropianë apo me Mogherinin, lusja për vendin tim që të afrohej data e bisedimeve, pa dallim të konfrontimeve të brendshme si shtet. E kuptoj opozitën, por duhet të kemi kujdesin tonë ndaj shtetit, obligimi i të gjithëve është shteti, prandaj ekzistojmë. Si mik i Republikës së Shqipërisë, me të vërtetë ju uroj gjithë të mirat. Çdokush ka të drejtën e demonstratave, por të kemi kujdes për ardhmërinë e vendit. Vendi im është kandidat prej vitit 2005, qytetarët e Shqipërisë, presin ta hapin kapitullin. Prandaj ndava anët pozitive të vendit tonë, në fund kjo përkthehet në investime të huaja, në paga më të larta. Qëllimi i parë strategjik është të merret data e bisedimeve me BE-në dhe shpresoj të keni sukses”, është shprehur Zoran Zaev në konferencën e përbashkët për shtyp me kryeministrin Edi Rama./Opinion.al
Lexo edhe: Influenca ruse në vend, Rama: Rusia kundër integrimit, nuk është sekret
