Nga Pogradeci, ku po zhvillohet mbledhja e përbashkët e dy qeverive shqiptare dhe maqedonase, Kryeministri i shtetit fqinj, Zoran Zaev ka premtuar se në Janar votohet ligji për përdorimin e Gjuhës Shqipe në Maqedoni.
“Presim me padurim që ligji i Gjuhës Shqipe të kalojë dhe zbatimi të nisë një orë e më parë”, tha kryeministri ynë Edi Rama. Në përgjigje të interesit të tij, Zoran Zaev deklaroi: “Gjuha ka kaluar në parlament. Tani duhet që kryetari i parlamenti të përcaktojë datën dhe përfundimisht do të votohet ligji. Unë shpresoj që ligji do të aprovohet diku në fund të Janarit”.
Më herët gjatë mbledhjes së përbashkët, Rama e konsideroi të rëndësishëm stabilitetin e Maqedonisë edhe për të gjithë rajonin. Edhe kryeministri i Maqedonisë vlerësoi mbështetjen e Shqipërisë dhe tha se qeveria e tij po punon për garantimin e të drejtave të shqiptarëve sipas Marrëveshjes së Ohrit.
Kryeministrat njoftuan firmosjen e disa marrëveshjeve mes dy vendeve, për lehtësira në qarkullimin e mallrave dhe në fushën e sigurisë, arsimit dhe kulturës.
Kreu i qeverisë shqiptare tha se bashkëpunimi mes dy vendeve i jep fund një historie ku konfliktet e së shkuarës kërcënojnë që të na rikthehen në pengesa në rrugët e të ardhmes.
Kryeministrat njoftuan gjithashtu se takimi i radhës mes dy qeverive do të mbahet në fillim të 2018-ës, në Ohër ose Strugë.
