Teksa ka folur në një konferencë të mbajtur sot për për 110-vjetorin e krijimit të Gjykatës së Lartë, ambasadorja e SHBA, Yuri Kim ka deklaruar se kanë kaluar tre vite dhe tashmë është koha për një ambasador të ri të SHBA në vendin tonë.
Gjatë fjalës së saj, Kim theksoi se pavarësisht ndryshimit të ambasadorëve, angazhimi i SHBA-së për Reformën në Drejtësi në Shqipëri nuk ka për të ndryshuar.
“Ka kaluar mbi 3 vite dhe fakt është që sikurse e dinë të gjithë, pas 3 viteve është koha për nje ambasador të ri dhe të gjithë kemi parë procesin që është zhviluar në Uashington. Sikurse e kam përmendur, Reforma në Drejtësi dhe angazhimi i SHBA për të mbështetur Shqipërinë nuk ka për të ndryshuar. Ju mund të ndryshoni ambasador, por kjo gjë nuk ka për të ndryshuar. Dhe kjo është ajo që do doja t’ju thoja. Shoh fytyrat e të gjithë personave që janë këtu në këtë sallë.
Unë kam punuar me secilin prej jush ngushtësisht dhe ndonjëherë na është dashur të zhvillojmë biseda të vështira, na është dashur t’i themi gjëra njëri-tjetrit që do të kishim preferuar të mos i kishim thënë, por shpresoj që ju do kuptoni se kur Shtetet e Bashkuara flasin për Reformën në Drejtësi, kur Shtetet e Bashkuara insistojnë, këmbëngulin që Shqipëria të bëhet më mirë, e bëjnë këtë si një mik i sinqertë, e bëjmë këtë sepse ne e dimë se ka gjëra më të mëdha për Shqipërinë, e bëjmë këtë sepse bashkëndajmë shpresën e popullit shqiptar që ky është një vend ku mundësitë janë të disponueshme për të gjithë njerëzit, që askush nuk është mbi ligjin dhe që ka ende gjëra më të mëdha të planifikuara për secilin prej nesh”, u shpreh ambasadorja amerikane.
