Ministri i Drejtësisë, Ylli Manjani, kërkon të ndërtojë një sistem drejtësie të ngjashëm me atë të Irlandës, e cila ka shumë më pak gjyqtarë se Shqipëria.
Në një intervistë me gazetën Dita, Manjani thotë se thotë se Shkolla e Magjistraturës nxjerr vetëm njëzet gjyqtarë të rinj në vit, ndërkohë që kërkon kujdes për të mos i konsideruar të gjithë gjyqtarët në detyrë si të korruptuar. Sipas Manjanit, reforma e vërtetë në drejtësi ende nuk ka filluar, për sa kohë që po diskutohet vetëm për ndryshime kushtetuese dhe jo direkt për menaxhimin e gjykatave.
“Ne nuk kemi burime njerëzore të gatshme për t’i futur masivisht në sistemin gjyqësor. Sepse Shkolla e Magjistraturës ne na prodhon 20 vetë në vit.
Ndërkohë nevojat i kemi shumë më të mëdha. Atëherë çfarë do të duhet të bëjmë? Do të duhet të liberalizojmë dhe Shkollën e Magjistraturës, do të duhet të hapim dhe kuotat e pranimit. Do të ftojmë sa më shumë studentë në Shkollën e Magjistraturës që t’u përgjigjemi nevojave për gjyqtarët e rinj”, shprehet ai.
Ministri shton se duhet qartësi përsa i përket numrit të gjyqtarëve për të cilët ka nevojë vendi:
“Ajo që unë kam në plan është që të prezantoj sistemin që funksionon shumë mirë në Irlandë. Irlanda ka 4,5 milionë banorë dhe i shërben qytetarëve të vet me 105 gjyqtarë! Ndërsa ne kemi efektivisht 2.5 milionë banorë në territor dhe kemi 360 gjykatës dhe duam prapë! Më falni, por këtu nuk ka keqmenaxhim. Ky është kolaps. Kjo vjen për shumë arsye. Kjo është reforma e vërtetë, nuk është Kushtetuta, e më the të thashë.
Janë të rëndësishme edhe ato, por nuk është thelbi. Thelbi i reformës është kjo: Në çfarë sistemi menaxherial do ta ndërtojmë këtë vend, si do t’u shërbejmë 2.8 milionë banorëve me një numër efektiv gjykatash dhe gjykatësish. Që askush të mos jetë i mbingarkuar në punë dhe t’i shërbehet në një kohë të shpejtë njerëzve. Ky është thelbi i reformës organizative, nuk kemi filluar ende të merremi me këtë”.
