Sulmi i xhihadistëve në një qytet në veri të Burkina Fasos ka lënë të vrarë 35 civilë, shumica prej të cilëve ishin gra.
Ky është sulmi më vdekjeprurës që prej fillimit të dhunës së xhihadistëve në këtë vend të Afrikës Perëndimore. Për këtë arsye Presidenti Roch Marc Christian Kabore, shpalli dy ditë zie kombëtare.
Në njoftimin zyrtar të ushtrisë thuhet se 7 ushtarë dhe 80 xhihadistë janë vrarë në sulmin që ndodhi në provincën Soum.
Rajoni i Afrikës Perëndimore ka parë një përshkallëzim të dhunës si pasojë e sulmeve të militantëve që nga viti 2015. Këto ngjarje kërcënojnë raportet tradicionalisht të mira mes shumicës myslimane dhe komunitetit katolik në Burkina Faso.
Liderët e grupit G5 të rajonit Sahel, ku përfshihen Burkina Faso, Nigeri, Mali, Mauritania dhe Çadi, gjatë një samiti të mbajtur në fillim të këtij muaji, bën thirrje për bashkëpunim dhe ndihmë ndërkombëtare për të luftuar kërcënimin nga militantëve islamistë. /Opinion.al
