Familja e Ardit Gjoklaj akuzon eskavatoristin Edmond Kollari se, pasi e ka goditur 17 – vjeçarin, e ka fshehur kufomën mes plehrave në Sharrë për më shumë se 10 orë.
“U masakrua atje nga eskavatoristi, atë e kanë lënë 10 orë pa treguar hiç, kanë dashur ta zhdukin fare sipas atyre. Kemi njoftuar policinë. Të shtunën në darkë ka ikur turn i tretë, të dielën në mëngjes s’ka dalë hiç dhe nuk ka ardhur në shtëpi. Kemi dalë dhe kemi kërkuar gjithë ditën deri në orën 12:00, kemi njoftuar policinë. Pas orës 3 e kanë gjetur në mbeturina të fshehur.” Kështu u shpreh xhaxhai i tij Lush Gjoklaj, në emër të familjes. Ai kërkon që policia dhe prokuroria të zbardhin të vërtetës dhe të vendosin para përgjegjësisë autorët e krimit.
“Shtetit ja lëmë në dorë shtetit se eskavatoristi që e ka mbytur dhe ka dashur ta fshehë, na ka borxh si rregull gjithë jetën”, tha më tej ai mes dhimbjes.
Ardit Gjoklaj, djali i një oficeri policie, kishte një javë që kishte filluar punë në landfillin e Sharrës për të siguruar para për vitin e ri shkollor.
Ndërkohë, Edurim Teqja, 48 – vjeç, administratori i firmës 3R, përgjegjëse për seleksionimin e plehrave është shpallur në kërkim si i dyshuar për veprën penale të shpërdorimit të detyrës, ndërsa katër punonjës, mes tyre dhe eskavatoristi, janë arrestuar pas ngjarjes.
Ditën e sotme, familjarët i dhanë lamtumirën djalit të mitur i cili vdiq i masakruar nga eskavatori, teksa kishte shkuar të punonte gjatë muajve të verës. Arditi priste të niste këtë shtator klasën e 9-të dhe vështirësite ekonomike e kishin detyruar të punonte.
Intervista e plotë me xhaxhain e Arditit, Lush Gjoklaj.
Sot, keni varrimin?
Sot kemi varrimin.
Sa vjeç ishte?
17 vjeç. U masakrua atje nga eskavatoristi, atë e kanë lënë 10 orë pa treguar hiç, kanë dashur ta zhdukin fare sipas atyre. Kemi njoftuar policinë. Të shtunën në darkë ka ikur turn i tretë, të dielën në mëngjes s’ka dalë hiç dhe nuk ka ardhur në shtëpi. Kemi dalë dhe kemi kërkuar gjithë ditën deri në orën 12:00, kemi njoftuar policinë. Pas orës 3 e kanë gjetur në mbeturina të fshehur.
E kishin fshehur?
Fshehur. Ata e kanë ditur se kanë qenë 40 shokë aty eskavatorisë, e kanë mbyllur dhe fshehur aty pas zetorit, me 90 % që të mos e gjejmë më.
Po pastaj, dyshuat ju si familje?
Ne dyshuam sepse aty e kishim çuar, pyetëm shokët ku ka qëndruar ku ka ikur dhe pas orës 2:30 , 3 e ka gjetur policia. Nuk na ka njoftuar askush se është gjetur, vetëm te Spitali Ushtarak kur e kanë dërguar kufomën atje, ishte i shpërfytyruar , pa kokë pa krahë, i hapur plotësisht. Ka qëndruar 10 orë në mbeturina në mes të vapës.
Çfarë dyshoni ju se ka ndodhur?
Ne dyshojmë se është mbyur aty prej eskavatoristit, ata kanë dashur që t’i humbin gjurmët dhe të mos bien fare në sy.
Kur ka qëndruar 10 orë aty, normal që kanë dashur ta fshehin. I kemi pyetur 20 herë shokët dhe thonin nuk e kemi parë, nuk ka dalë nga puna fare, nuk e kemi takuar.
Prej sa kohësh Artiti punonte aty ?
Punë jave sepse ka punuar për pushime verore, hajt se po merr ndonjë lek për vete dhe për familjen. Afër shtëpisë e ka pasur.
Ka lënë vëllezër, motra?
Ai ka lënë një vëlla më të madh se veten dhe një motër më të vogël. I ati është polic, ka punuar 20 vite polic, vëllai i tij ka qenë gjithashtu polic dhe është dëshmor i atdheut.
As policia s’na ka respektuar as nuk ka ardhur njeri, Saimir Tahiri si bën gjithë këtë punë me humb një kufomë e mos me e gjet. Për respekt të shokëve të vet që i kam pas dëshmor atdheu dhe tjetrin polic 20 vjet.
Çfarë kërkoni nga shteti pas kësaj ngjarje?
Shteti duhet të jetë më i vendosur vetë dhe më i drejtë vetë. Për një kufomë 17 vjeç që është lënë 10 orë aty, është dashur që të na njoftojë për gjetjen e kufomës dhe për vijimësinë e veprimeve të tyre lidhur me këtë çështje.
A e dinit që nuk e kishin siguruar djalin?
Ne nuk e dimë këtë.
Më përfaqësuesit e firmës që janë arrestuar keni kontaktuar?
Ne s’ka kanë lënë të takojmë asnjeri, as na ka thënë njeri gjë.
Sa paguhej Artiti?
Për rrogën nuk kam dijeni se sa paguhej.
Ju ja lini shtetit në dorë ngjarjen?
Shtetit ja lëmë në dorë shtetit se eskavatoristi që e ka mbytur dhe ka dashur ta fshehë, na ka borxh si rregull gjithë jetën.
A ka patur konflikte me njeri?
Djali nuk ka patur konflikte me njeri se ishte vetëm 16 vjeç, tepër i ri dhe shumë punëtor, hidhej në klasën e 9-të.
Nuk ka ardhur asnjeri për t’iu takuar?
Të paktën të vinte dikush për ngushëllime, nuk ka ardhur asnjeri.
Po nga bashkia?
As bashkia, askush.
Mendoni se mund të tentohet të mbyllet kjo çështje?
Ne ja lëmë në dorë shtetit këtë çështje dhe të bëjë çfarë të dojë edhe pse besim nuk kemi në të, pasi u bënë 4 ditë që s’kemi asnjë të dhënë prej shtetit. U kapën katër veta por s’kemi asnjë të dhënë, dhe më kryesorja është se pse është lënë 10 orë aty se shteti e ka të lehtë shumë. Është rrahur natën.
Ju e keni bërë denoncimin në mëngjes?
Ne e kemi bërë denoncimin në polici në 8 të mëngjesit se na ka humbur sepse nuk e kemi gjetur askund. Ata punonjësit e Landfillit thanë se nuk ka dalë nga puna.
Pasi u gjet çfarë sqarimi i’u dhanë ata?
Pasi u gjet kufoma nuk ka kanë lënë të hyjmë atje për ta parë, vetëm te spitali. Te spitali s’kemi takuar asnjë as policë, as nuk ka ka s’qaruar njeri, kanë bërë letrat dhe kaq.
As ekspertizën mjeko-ligjore , asgjë s’na kanë sqaruar. Ne nuk kemi gjetur asnjeri përveç kufomës dhe infermieret.
Kemi katër ditë pa marrë asnjë informacion, por njeriu jonë ka ikur është masakruar, 10 orë ka qëndruar në mbeturina për të mos e parë njeri.
Ju dyshoni se ka patur tentativë nga eskavatoristi për ta fshehur kufomën?
Ne dyshojmë se ka pasur tentativë nga eskavatoristi për ta zhdukur. Eskavatoristi ka thënë se e kanë sjellë nga jashtë ka ardhur me mbeturinat dhe se nuk është mbytur këtu, djali ka qëndruar 10 orë aty I mbuluar në mbeturina, s’ka treguar njeri.
/Tv Klan
