Ministri i Brendshëm Fatmir Xhafaj në një deklaratë për median e quan protestën e sotme në Rrugën e Kombit: “Një precedent jashtëzakonisht i rrezikshëm dhe antikushtetues.”
Xhafaj tha se Policia e Shtetit ka marrë masat për një manifestim paqësor, por punonjësit e rendit u ndodhën në një sulm barbar të grupeve dhe personave me precedentë kriminalë.
“Qytetarët e Kukësit u distancuan nga individët e papërgjegjshëm dhe nuk u bënë pjesë e atyre që pa asnjë shkak sulmuan barbarisht sulmin nga punonjësve të policisë dhe shkatërruan pronën publike dhe private. Janë dëmtuar 12 punonjës të policisë nga gurët e hedhur dhe një tjetër punonjës policie ndodhet në gjendje më të rëndë. Vlerësoj qëndrimin e mbajtur nga Policia e Shtetit e cila ruajti gjakftohtësinë. U kërkoj qytetarëve, medias, komunitetit të biznesit dhe partive politike që të distancohen ndaj atyre politikanëve që i kanë frymëzuar aktet e dhunshme, që bien ndesh me Kushtetutën e vendit”, – tha Xhafaj.
Në vijim ai shtoi se Policia e Shtetit do të ketë një reagim të ashpër ndaj cilitdo që është përfshirë në aktet e dhunës.
“Kush nxit dhunën dhe anarshinë do të marrë përgjigjen e duhur ligjore”, – tha Xhafaj.
Në përleshje, individë me të shkuar kriminale
Ministri Xhafaj shtoi se mes protestuesve ka pasur dhe individe me të shkuar kriminale
Xhafaj: Manifestimi i presupozuar paqësor u kthye menjëherë në një sulm barbar kundër punonjësve të policisë së shtetit dhe kundër pasurisë publike edh asaj private. Grupe individësh të papërgjegjshëm në përbërje të të cilëve në numër jo të vogël gjendeshin elementë me të shkuar të rëndë kriminale dhe persona të tjerë me rrezikshmëri të lartë shoqërore shfrytëzuan pabesisht të drejtën legjitime dhe paqësore të tubimit.
Shpreh gjithë mbështetjen dhe respektin për të gjithë ata qytetarë të një zone të dalluar për ndershmëri, krenari e fisnikëri sikurse është zona e Kukësit të cilët u distancuan nga këta individë të papërgjegjshëm si edhe ndaj atyre që nxisin veç zjarrin dhe dhunën për interesa politike e nuk u bënë pjesë e atyre që pa asnjë shkak sulmuan egërsisht punonjësit e policisë së Shtetit dhe shkatërruan pasurinë publike e private.
