Me afrimin e ceremonisë së dorëzimit të Topit të Artë, ashtu si ndodh çdo vit, nis edhe gara e parashikimeve për fituesin e çmimit më të rëndësishëm individual në futboll.
Në finalen për trofeun e FIFA-s dhe France Football janë mbajtësi në fuqi i trofeut, Cristiano Ronaldo, rekordmeni Lionel Messi dhe braziliani Neymar.
Messi duket i favorizuar përballë shokut të skuadrës te Barcelona dhe rivalit të përjetshëm portugez. Arsyet përse Messi duhet të jetë fitues i ka dhënë ish-kapiteni blaugrana, Xavi Hernandez, i intervistuar nga faqja zyrtare e FIFA-s.
Sipas ish-trurit të Barçës, “Messi është në avantazh për gjithçka që arriti të fitonte me Barcelonën. Është një futbollist që dominon në të gjitha aspektet e lojës. Leo është lojtari më i mirë në qarkullim dhe këtë e tregon në çdo ndeshje”. Për Xavin këto janë arsyet përse “Messi e meriton Topin e Artë”.
Mesfushori kujton edhe finalen e vitit 2010, kur ishte së bashku me Iniestën dhe Messin, duke plotësuar një podium historik për Barcelonën. Xavi e cilësoi atë edicion si “të jashtëzakonshëm për klubin katalan dhe për të gjithë ata që vlerësuan filozofinë e lojës së paraqitur”.
Në mbrëmjen gala të 11 janarit në Zyrih, Messi mund ta fitojë Topin e Artë për herë të pestë në karrierë. Sipas Xavit, argjentinasi dhe Ronaldo, fitues i dy edicioneve të fundit janë ende mbi Neymar, ndërsa nuk përjashton që shumë shpejt garës për çmimin ti shtohet edhe Luis Suarez që po shkëlqen në Camp Nou. (ss)
