Presidenti serb, Aleksandar Vuçiç ka thënë të hënën pas një takimi me Olena Zelenskan, gruan e presidentit të Ukrainës, Volodymyr Zelensky, se Serbia është e gatshme të “ofrojë fonde si ndihmë për ata që kanë nevojë më së shumti” dhe ka uruar “që paqja të kthehet në çdo shtëpi, sa më shpejt që është e mundur”.
Në një postim në Instagram, ai e ka falenderuar Zelenskan për vizitën në Serbi dhe forcim të lidhjeve mes dy vendeve, në këto “koha të vështira”.
“Kemi diskutuar lidhjet kulturore të shteteve tona, si dhe çështjet humanitare, sidomos nevojat e kategorive më të ndjeshme të popullsisë dhe fëmijëve, ata që janë më të cenueshmit në secilin konflikt”, ka shkruar Vuçiç.
Zelenska, bashkë me ministrin e Jashtëm ukrainas, Dmytro Kuleba, kanë arritur më 12 maj në Serbi, për t’u takuar me krerë të lartë shtetërorë.
“Respekt reciprok për integritetin territorial”
Kryeministri i Serbisë, Millosh Vuçeviç i ka thënë të hënën ministrit të Jashtëm ukrainas, Dmytro Kuleba që Serbia është e përkushtuar për respektim të ligjit ndërkombëtar dhe integritetit territorial të secilit vend anëtar të Kombeve të Bashkuara, përfshirë Ukrainën.
Kjo është vizita e parë e një zyrtari të lartë ukrainas në Serbi, qysh prej nisjes së luftës së Rusisë në Ukrainë, në shkurt të vitit 2022.
Kuleba është takuar edhe me presidentin e Serbisë, Aleksandar Vuçiç, si dhe është planifikuar një takim me kryetaren e Kuvendit serb, Ana Bërnabiç.
Qeveria e Serbisë ka thënë se kryeministri Vuçeviç dhe ministri Kuleba kanë diskutuar për situatën aktuale në fushën e sigurisë dhe politikës në nivel global, si dhe për mundësinë e bashkëpunimit ekonomik në mes të të dyja vendeve.
“Ne jemi të hapur ndaj të gjitha çështjeve”, ka thënë kryeministri Vuçeviç dhe e ka falënderuar Kuleban që e ka përmendur ndihmën humanitare që Serbia e ka ndarë për popullin ukrainas.
Sipas Qeverisë serbe, Kuleba ka thënë se shkuarja e tij në Serbi përçon mesazh që ka hapësirë për t’i forcuar marrëdhëniet në mes të këtyre dy vendeve.
“Serbia dhe Ukraina kanë shumë dallime, por edhe shumë të përbashkëta, dhe kjo është arsyeja se mund të ndërtojmë të ardhme të përbashkët në shumë fusha”, është cituar të ketë thënë Kuleba.
Zelenska dhe Kuleba e kanë nisur vizitën në Serbi 10 ditë pas formimit të Qeverisë së re, pjesë e së cilës janë dy emra të afërt me Rusinë, për çka Beogradi është kritikuar nga Bashkimi Evropian dhe Shtetet e Bashkuara.
I pari është Aleksandar Vulin, zëvendëskryeministri pro-rus dhe ish-shefi i shërbimit të inteligjencës.
I dyti është Nenad Popoviç, ministër pa portofol, i cili ka lidhje politike dhe biznesore në Rusi.
Të dy janë të sanksionuar nga Shtetet e Bashkuara.
Presidenti serb, Aleksandar Vuçiç është takuar me liderin ukrainas, Volodymyr Zelenky tri herë prej nisjes së luftës së Rusisë në Ukrainë, dhe hera e fundit ka qenë në shkurt, në Tiranë.
Serbia e mbështet integritetin territorial të Ukrainës, që përfshin edhe Gadishullin e Krimesë, i cili është aneksuar nga Rusia më 2014.
Megjithatë, ndonëse është kandidate për anëtarësim në Bashkimin Evropian, Serbia nuk e ka harmonizuar politikën e jashtme me atë të Brukselit, dhe nuk u është bashkuar sanksioneve kundër Rusisë.
Prej vitit 2022, Serbia ka pranuar mijëra refugjatë ukrainas, ka dërguar ndihmë humanitare në Ukrainë dhe është zotuar se do ta ndihmojë Kievin për t’u rindërtuar./REL
