Presidenti i Serbisë, Aleksandar Vuçiç, po pretendon se situata e sigurisë në Kosovë është komplekse.
Kabineti i Vuçiç ka njoftuar sot se Presidenti serb po anulon vizitën në rajonin e Banatit të Jugut në Serbi, për shkak të “situatës komplekse të sigurisë në Kosovë”.
Konkretisht në njoftim thuhet se “për shkak të situatës komplekse të sigurisë në Kosovë, presidenti serb Aleksandër Vuçiç gjatë ditës do të zhvillojë disa takime me faktorë politikë të brendshëm dhe të jashtëm në përpjekje për të stabilizuar situatën”.
“Prandaj ai sot do të marrë pjesë vetëm në mbledhjen e madhe publike në Pançevë, e cila është caktuar për në orën 18:00”, thuhet në njoftimin e shkurtër.
Vuçiç do të vizitonte sot disa qytete në Serbi. Arsyeja e anulimit të këtyre vizitave lidhet me betimin e paralajmëruar të Erden Atiqit në një seancë ceremoniale si kryetar i ri i Mitrovicës së Veriut.
Vuçiç dje ka thënë se asnjëherë nuk do t’i njohin kryetarët e rinj shqiptarë të dalë nga zgjedhjet e 23 prillit në katër komunat e veriut të Kosovës.
