Janë zbardhur detaje të reja nga ngjarja e rëndë e ndodhur në Itali, ku një 45-vjeçar shqiptar vrau të bijën 16 vjeç dhe një shtetas italian.
Sipas informacioneve zyrtare, autori i dyshuar është Taulant Malaj, 45-vjeçar shqiptar, bukëpjekës, i cili tashmë është ndaluar nga karabinierët.
Sipas hetimeve të para, vajza u qëllua pasi ndërhyri për të mbrojtur nënën e saj nga agresioni i babait të saj, i cili donte ta vriste.
Motivi i krimit mendohet të ketë qenë një lidhje e dyshuar mes shtetasit italian Massimo De Santis dhe ish-bashkëshortes së autorit të ngjarjes.
Sipas detajeve të para mësohet se Malaj ishte xheloz dhe ka qenë i bindur se gruaja ka pasur një marrëdhënie intime me De Santis. Krimi ka ndodhur rreth orës dy të mëngjesit ku bëhet me dije se shtetasi italian është goditur me thikë në shkallët e pallatit në të cilin ndodhej.
Mediat italiane thonë se dyshohet se ish-gruaja ka ndërhyrë për të ndaluar Malajn, por mbeti e plagosur. Edhe vajza e tij 16-vjeçare dyshohet se ka ndërhyrë për të qetësuar babain, por ra viktimë.
Për De Santis ishte shumë vonë ndërhyrja, ndërsa vajza 16-vjeçare ishte akoma gjallë.
Ajo u nis drejt spitalit, por ndërroi jetë rrugës. Nëna e saj nga ana tjetër ndodhet në spital, jashtë rrezikut për jetën.
Në momentin që ka arritur policia, ka bllokuar 45-vjeçarin, i cili sipas hetuesve po endej në zonë në kërkim të djalit tjetër pesëvjeçar që kishte me të njëjtën grua.
Nga kontrollet policore të bëra në zonën në të cilën ndodhi ngjarja, është gjetur arma e vrasjes, një thikë kuzhine./Opinion.al
