Gjykata e Qarkut në Affoltern am Albis (Kantoni i Zyrihut) ka dënuar sot me burg përjetë një 39-vjeçar shqiptar, i cili akuzohet për vrasjen e bashkatdhetarit të tij për një borxh 30 mijë franga. Sipas mediave zviceriane, shqiptari përveç dënimit me burg duhet të paguajë dëmshpërblim prej 60 mijë frangash bashkëshortes së viktimës.
Sipas gjykatës, 39 vjeçar në viti 2009 e ka ekzekutuar me pistoletë nga afër në automjet ish-shokun e tij, ngjarje kjo e ndodhur në Boonstetten, përcjell albinfo.ch. Pasi e ka vrarë, ai e ka hedhur viktimën në një përrua. Një kalimtare e rastit ka gjetur trupin e pajetë të shqiptarit një ditë më vonë. Tri javë pas vrasjes, personi në fjalë është arrestuar dhe prej atëherë mbahet në burg, ndërsa nuk dihet identiteti i tij.
I akuzuari gjatë tërë kohës ka kundërshtuar duke thënë se nuk është fajtor për asgjë. Sipas tij nuk ka dëshmi për vrasjen. Por ndryshe kanë menduar prokuroria dhe gjykata. Ato janë mbështetur në dëshminë e ish partneres së të akuzuarit për vrasje, e cila e ka ndjekur ngjarjen pasi që ka qenë ulur në ulësen e mbrapse të makinës. Vendimi nuk është ende i plotfuqishëm./BW
