Gjykata e Fierit ka dënuar me 33 vite burg Ëngjëll Hodajn, i akuzuar për vrasje në rrethana cilësuese, ngjarje e ndodhur më 28 shkurt të vitit të kaluar në fshatin Roms në Mallakastër. Në këtë ngjarje ka mbetur i vdekur me armë zjarri Eduart Zotaj dhe është plagosur rëndë Blerim Beqiraj.
Shkak për këtë ngjarje të rëndë ka qenë një debat i momentit ndërmjet autorit dhe viktimës e të dëmtuarit, të cilët gjendeshin në një lokal të zonës. Gjykimi ndaj të pandehurit është zhvilluar me procedurë të shkurtuar dhe, për këtë arsye, në përfundim gjykata e dënoi përfundimisht me 22 vjet burgim.
Vrasja
Në datën 28 shkurt 2015, rreth orës 15:30, në vendin e quajtur Roms Fier dhe pikërisht në lokalin e Muharrem Zotajt, Ëngjëll Hodaj ka vrarë me armë Eduart Zotajn dhe ka plagosur Blerim Beqirajn. Rezulton se, Ëngjëll Hodaj të ketë qenë në lokalin e Muharrem Zotajt të ndodhur në fshatin Roms Mallakastër së bashku në një tavolinë me këtë të fundit dhe me shtetasit Dilaver Begaj, Eduart Zotaj dhe Blerim Beqiraj. Midis pronarit të lokalit Muharrem Zotaj dhe të pandehurit Ëngjëll Hodaj ka pasur një debat, pasi ky i fundit ka drejtuar fjalë fyese në drejtim të Sadik Beqirajt, i afërt i Muharremit, i cili nuk ka qenë i pranishëm në këtë moment, pasi ishte larguar disa minuta më parë.
Muharrem Zotaj ka goditur me shkelm të pandehurin, duke e larguar nga lokali i tij. Pasi është larguar nga lokali i pandehuri Ëngjëll Hodaj, rezulton të jetë larguar edhe shtetasi Dilaver Begaj i njohur me emrin Elton. Pasi kanë kaluar rreth dhjetë minuta nga momenti i largimit të të pandehurit nga lokali, ky i fundit ka qëlluar me armë në drejtim të tavolinës ku kanë qenë shtetasit Muhamet Zotaj, Eduart Zotaj dhe Blerim Beqiraj. Muhamet Zotaj dhe Blerim Beqiraj kanë dëgjuar një zhurmë të goditjes me armë dhe kanë parë se është rrëzuar një prej personave të ulur në këtë tavolinë dhe pikërisht shtetasi Eduart Zotaj, i cili ka rënë në tokë dhe ka gjetur vdekjen nga goditja me armë dhe gjithashtu është plagosur shtetasi Blerim Beqiraj.
Hetimet
Sipas dosjes së prokurorisë, nga këqyrja e vendit të ngjarjes rezulton se, në një prej kanatave të derës kryesore të lokalit dhe konkretisht në kornizën ndarëse të xhamit, konstatohet një vrimë hyrëse me diametër rreth 8 mm, e cila ka përshkuar tejpërtej kornizën. Vrima dalëse, e cila gjendet në pjesën e brendshme të lokalit, është me buzë të dala dhe me diametër rreth 1.6 cm. Paralel me kanatin e lartpërmendur vërehet një vazo lule, ku në tre prej gjetheve konstatohen tri vrima në formë të çrregullt, të cilat janë paralele me njëra-tjetrën. Në drejtimin jugor të lokalit, pranë një vazoje me lule, u fiksuan në dysheme njolla të zbehta me ngjyrë të kuqe. Jashtë lokalit, rreth 12.7 m nga porta metalike e lokalit është konstatuar një aparat telefoni. Nga këqyrja e kufomës së Zotajt rezulton se, vërehet një plagë në kokë.
/gazeta shqip/
