Policia e Durrësit në bashkëpunim me Policinë e Tiranës arrestoi të dyshuarin kryesor për vrasjen e Arben Beqirajt në Plazhin e Vjetër në Vlorë në fillim të gushtit të këtij viti.
Eduart Xhezo, 34-vjeç, konsiderohet si person me rrezikshmëri të lartë shoqërore në fushën e krimeve ndaj personit.
Policia bën të ditur se ai u ndalua pas një ndjekjeje disa ditore nga Drejtoria Vendore e Policisë Vlorë, Tiranë, e Durrës .
“Qarkullonte me shpejtësi tej normave të lejuara, nën efektin e lëndëve narkotike, me kartë identiteti të falsifikuar dhe nuk iu bind urdhrit të Policisë për të ndaluar në dy pika kontrolli, por prangoset pas ndjekjes dhe bllokimit të rrugës në Shkozet, Durrës, 34-vjeçari nga Vlora, i shpallur në kërkim për veprat penale “Vrasja në rrethana cilësuese”, kryer në bashkëpunim, e mbetur në tentativë dhe “Mbajtja pa leje e armëve, armëve shpërthyese dhe e municioneve”” thuhet në njoftimin e policies.
Xhezo u ndalua në vendin e quajtur “Mbikalimi i këmbësorëve” te unaza e Shkozetit. Gjatë kontrollit të mjetit u gjetën një sasi e vogël lënde narkotike cannabis dhe dy karta identiteti me iniciale A. S., dhe S. J.. Pas verifikimit të bërë karta e identitetit me emër A. S. rezultoi e falsifikuar.
Shtetasi Eduart Xhezo është person me precedent të theksuar kriminal në fushën e krimeve ndaj personit dhe armëmbajtjes pa leje, i dënuar më parë për tentativë vrasjeje dhe armëmbajtje pa leje. /Opinion.al
