Policia e Tiranës ka zbardhur ditën e sotme dinamikën e krimit në Zall Bastar, ku humbi jetën 81-vjeçari Xhemal Meta.
Përmes një deklarate për mediat, Policia bën me dije se autori i ngjarjes është Isuf Hasa, 64 vjeç.
Sipas bluve, Hasa ka shkuar në banesën e të moshuarit dhe e ka goditur për motive të dobëta me çekiç në pjesën e pasme të kokës, duke i shkaktuar vdekjen.
“Nga tërësia e veprimeve të thelluara hetimore ka rezultuar se më datë 13.01.2025, rreth ores 09:00, shtetasi Isuf Hasa, 64 vjec, ka shkuar në banesën e fqinjit të tij Xhemal Meta dhe për motive të dobëta e ka qëlluar atë me një mjet të fortë (çekiç) në pjesën e pasme të kokës duke i shkaktuar vdekjen. Nga veprimet hetimore dyshohet se autori i dyshuar Isuf Hasa, pasi e ka goditur viktimën i ka marrë dhe një sasi vlerash monetare që ai mbante në xhep, dhe më pas është larguar. Nga kontrollet e shumta të kryera në disa banesa të autorit dhe familjarëve të tij, janë gjetur dhe sekuestruar një sasi prej 200.000 lekë të rinj”, theksoi policia.
Uniformat blu kanë ushtruar kontrolle dhe në banesën e vajzës së Isuf Hasës, ku kanë gjetur çekiçin me të cilin autori ka kryer vrasjen e Xhemal Metës.
