Arben Veshaj 37-vjeçari i cili shkonte nga fshati në stanin e bagëtive është masakruar nga kushëriri i tij. Ngjarja e rëndë ka ndodhur në sytë e djalit 7 vjeç të viktimës.
Dilaver Veshaj e ka qëlluar me pistolete dhe më pas me sëpatë derisa e ka lënë të vdekur. Mësohet se teksa kalonte pranë stanit të kushëririt, Arbenit dhe të birit i janë sulur qentë. Ai i ka qëlluar me gurë për t’i zmbrapsur, por vetëm pak çaste më pas kushëriri i tij, 40-vjeçari Dilaver Veshaj, pa asnjë paralajmërim, ka nxjerrë pistoletën duke qëlluar katër herë në drejtim të tij. Pasi nuk ka mundur dot ta vrasë me plumba, autori i është sulur dhe me sëpatë duke e goditur shumë herë në kokë dhe për pasojë e ka lënë të vdekur në vend.
Autori i krimit, Dilaver Veshaj, gjatë marrjes në pyetje për shkakun e masakrimit të kushëririt të tij, ka deklaruar se e ka bërë për t’i paraprirë vrasjes së tij nga Arbeni. “E vrava, sepse donte të më vriste”, është shprehur 40-vjeçari. Burime nga grupi hetimor kanë saktësuar se vetëm kjo ishte ajo çfarë ka deklaruar për ngjarjen, duke mos qenë në gjendje të flasë më shumë.
Burime nga Policia, konfirmojnë se pista kryesore në të cilën po hetohet mbetet ajo e ndonjë konflikti pronësie. Por gjithashtu nuk përjashtohet që gjithçka të ketë ndodhur nga një grindje e çastit. Pavarësisht kësaj, burimet thonë se, në bazë të dëshmive të siguruara, autori dhe viktima kishin pasur një konflikt mes tyre për një vijë uji që kalonte mes staneve të tyre, që ka sjellë dhe zënka verbale mes tyre.
