Gjykata e Apelit të Juridiksionit të Përgjithshëm ka shpallur të enjten vendimin për Mexhit Picarin, i cili akuzohet për vrasjen e ish-dhëndrit të tij Kudret Saliajt.
Gjykata vendosi dënimin me burgim të përjetshëm për Picarin, ndërsa për vajzën e tij, Dhuratën, Apeli vendosi dënim me 4 vite dhe 6 muaj burgim. Kjo e fundit akuzohet për krijim të kushteve për të kryer vrasjen. Për Saliajn gjykata rrëzoi akuzën për bashkëpunim në vrasje.
Në korrik të këtij viti, Gjykata e Tiranës e dënoi me burgim të përjetshëm Mexhit Picarin. Kurse e bija, Dhurata u dënua me 30 vite burg. Babë e bijë u dënuan pasi bashkëpunuan për vrasjen e Kudret Saliajt, më 4 qershor të 2021.
Kujtojmë se ngjarja e rëndë ndodhi në vitin 2021. Çifti Dhurata e Kudret Saliaj, ishin në proces divorci për shkak se kishin mosmarrëveshje, kur ndodhi krimi i rëndë në muajin qershor të 2021. Viktima, Kudret Saliaj mbërriti në një lokal pranë gjykatës së Tiranës, ku priste të zhvillohej seanca e radhës për divorcin dhe ndodhej në praninë e avokatit të tij si dhe një punonjëseje sociale.
Vjehrri i tij Mexhit Picari pasi e vëzhgoi bashkë me të bijën Dhurata Saliaj, e qëlloi për vdekje dhëndrin, teksa në ngjarje mbeti i plagosur edhe avokati Adriatik Cami.
