Drejtësia greke ka kërkuar ekstradimin e Eduart Lamajt, i njohur dhe si Leando Lamaj. Vrasisi i dy biznesmenëve në Laç, akuzohet nga drejtësia greke se ka trafikuar kokainë nga Amerika Latine.
Lamaj akuzohet se ka qenë pjesë e një grupi që solli 180 kg kokainë nga Amerika Latine të kapur në portin e Pireut.
Por ekstradimi i tij në Greqi nuk pritet që të realizohet. Institucionet shqiptare i kanë kërkuar drejtësisë greke që të transferojë procedimin penal në Shqipëri për shkak se Lamaj është i akuzuar për vrasjen e Bujar Likës dhe Paulin Gjergjit, ngjarje e ndodhur më 30 maj të këtij viti.
Lamaj mbeti i plagosur në ngjarjen e30 majit dhe u arrestua 20 ditë më vonë në një klinikë private ku shkoi për t’u operuar pasi gjendja shëndetësore e tij ishte e rëndë. Pavarësisht, se ai ka pranuar autorësinë e krimit, prokuroria ende nuk ka hedhur dritë mbi motivin e krimit.
“Ministria e Drejtësisë në referencë të njoftimit të shpalljes në kërkim ndërkombëtar të shtetasit shqiptar, Eduart Lamaj, alias Leandro Simon nga autoritetet greke të drejtësisë, duke ju njoftuar për pamundësinë e ekstradimit nga Shqipëria në Greqi të këtij shtetasi, iu përcjell kërkesën e prokurorisë së Përgjithshme për transmetimin origjinal ose kopje të njësuar me origjinalin të, bashkë me përkthimin përkatëse të të gjitha materialeve që lidhen me procedimin penal ndaj tij, për akuzat e organizatës kriminale dhe trafikimit të lëndëve narkotike”, shkruan ministrja e Drejtësisë në letrën dërguar homologut grek. Ndërkohë, pritet që grekët ta transferojnë dosjen brenda shtatorit në Shqipëri/ Opinion.al.
