Nadire Kurti, gruaja që vrau një vit më parë bashkëshortin e saj Shefki Kurti, është dënuar me 14 vjet e 6 muaj burg nga Gjykata e Rovigo-s në Itali.
Nadirja, 69-vjeçare, e copëtoi trupin e pajetë të bashkëshortit dhe pasi e futi në disa qese e hodhi në një kanal.
Gruaja pranoi krimin e rëndë para autoriteteve italiane më 18 Gusht të vitit të kaluar. Ajo pohoi se kishte përdorur një hanxhar dhe disa thika. Sipas mediave italiane, trupi i burrit ishte copëtuar dhe më pas ishte vendosur në disa thasë plehrash të hedhura në kanalin Adigetto.
Zbulimi i pjesëve të trupit u bë më 31 gusht, kur këmba e tij e djathtë doli në sipërfaqe, e më pas hetuesit gjetën edhe pjesët e tjera të trupit të copëtuar të shqiptarit.
Prokurori shpjegoi se brutaliteti i këtij krimi i kishte bërë hetuesit që të mendonin pista të tjera fillimisht.
Por më vonë u zbulua se Nadirja kishte probleme psikologjike. Prej vitesh ajo ndiqej nga një psikiatër. Po ashtu, ajo ishte e shtruar në psikiatri në Gusht të vitit të kaluar për simptoma të çrregullimit të personalitetit.
