14-vjeçari i cili akuzohet se i mori jetën bashkëmoshatarit të tij duke e goditur me thikë, do të jetë sot përballë togave të zeza të Gjykatës së Tiranës.
Sipas Klan News, seanca për verifikimin e masës së sigurisë “arrest me burg” do të zhvillohet në ambientet e spitalit ku i mituri ndodhet i shtruar. Kjo prej plagës që ai ka marrë me thikën që ka përdorur vetë.
Prokuroria e Tiranës ka kërkuar që masa ndaj tij të caktohet për akuzën e “vrasjes në rrethana të tjera cilësuese”.
Kujtojmë se ngjarja e rëndë ndodhi të Hënën më 18 nëntor pranë shkollës “Fan Noli” në kryeqytet. Pas një sherri me thika për motive banale, mbeti i vrarë një 14 vjeçar.
Ky rast shkaktoi një reagim masiv tek qytetarët e jo vetëm, të cilët kanë zhvilluar edhe protestë ditën e djeshme. Ata kanë parashtruar një sërë kërkesash ndaj qeverisë, që nga dorëheqja e ministres së Arsimit Ogerta Manastirliu e deri te krijimi i një sistemi më efektiv të raportimit të rasteve të tilla konfliktuale mes të miturve në shkolla.Theksojmë 12 vite heqje lirie është maksimumi i dënimit që mund të jepet nga një Gjykatë në vendin tonë, nëse autori i krimit është i mitur. Dhe kjo, sipas Kodit Penal për të Miturit, nëse ai është nga 14 deri në 17 vjeç. Aplikimi i dënimeve me burgim për këtë moshë bëhet vetëm nëse vepra penale e kryer parashikon një dënim me minimum 7 vite heqje lirie, përcaktim ky që në rastin e vrasjes së nxënësit të shkollës “Fan Noli” plotësohet pasi vepra e kryer kategorizohet tek më të rëndat.
