Ditën e sotme vendi u trondit nga krimi në familje të ndodhur fshatin Shalës të Memaliajt, ku djali i vrau babain të tij me sëpatë. Mësohet se autori i vrasjes Arjan Shahaj, 35-vjeç ka qenë i dënuar me 12 vjet burg për tentativë vrasjeje të bashkëfshatarit të tij.
Ngjarje kjo e ndodhur në vitin 1998. Por, i riu nuk e kreu dënimin e plotë duke dalë nga burgu para disa viteve.
Po ashtu, Arjan Shahaj para disa vitesh ka tentuar të vrasë edhe nënën e tij. Shahaj dyshohet se vuan nga problemet mendore. Ndërsa krimi i sotëm, ka ndodhur në pyll pas një konflikti të çastit.
Pasi qëlloi babain me sëpatë,ai është larguar nga vendi i krimit dhe policia po kreh zonën me forca të shumta policie nga Tepelena, Këlcyra dhe Përmeti.
Njoftimi i policisë
Në fshatin Shalës, Bashkia Memaliaj, shtetasi A.Sh. 35 vjeç (me probleme të shëndetit mendor) ka goditur me mjete të forta babain e tij, shtetasin I. Sh., 77 vjeç, duke i shkaktuar vdekjen.
Drejtoria Vendore e Policisë Gjirokastër ka ngritur disa grupe kontrolli dhe po behet krehja e zonës për gjetjen dhe kapjen e autorit. Në vendngjarje ka shkuar grupi hetimor dhe po punon për zbardhjen e plotë të ngjarjes./ Opinion.al E.Xh.
