14-vjeçari që vrau 9 persona në një shkollë të Serbisë, e kishte planifikuar sulmin prej javësh duke hartuar dhe një “listë vrasjesh” sipas policisë.
Adoleshenti u arrestua fill pas ngjarjes, e në pranga janë vendosur po kështu edhe prindërit e tij. 7 vajza dhe një djalë të moshave 11 deri në 14 vjeç u vranë gjatë sulmit, së bashku me një roje sigurie ndërsa 6 fëmijë të tjerë dhe një mësuese mbetën të plagosur.
Vrasësi u identifikua si Kosta Kecmanovic, i konsideruar një prej nxënësve më të talentuar të shkollës.
Presidenti serb, Aleksandër Vuçiç, iu drejtua kombit për ngjarjen e rëndë.
Vuçiç tha se vrasësi u dërgua në një repart special të një klinike psikiatrik por nuk dha detaje të mëtejshme.
“Sot është një nga ditët më të vështira në historinë moderne të Serbisë. Serbia është bashkuar, për fat të keq, këtë herë në pikëllim. Agresori i dyshuar do të mbahet në një repart psikiatrik, pasi për shkak të statusit si i mitur, nuk mund të dalë në gjyq”, u shpreh Vuçiç.
Policia tha se Kecmanoviç përdori pistoletën e babait të tij, e cila ishte me leje. Sipas hetimeve i ati i adoleshentit e mbante armën në një kasafortë, por me sa duket djali e dinte kodin.
Për shkak se ai është minoren, Kecmanoviç nuk mund të përballet me akuza penale, tha zyra e prokurorit të Beogradit. Shërbimet sociale do të përcaktojnë se çfarë do të ndodhë me të./Opinion.al
