Sulmet anti-myslimane në Zelandën e Re e kapën në befasi popullatën e vogël vendase. Myslimanët në Zelandën e Re thonë se kurrë më parë nuk kanë hasur diskriminime dhe se sulmi ku humbën jetën 49 persona në xhami, i kapi në befasi.
“Kjo është diçka krejt e papritur”, tha Chelsea Daniels e stacionit radiofonik Neëstalk BZ, me qendër në Okland të Zelandës së Re. “Ne dëgjojmë herë pas here të flitet për këta lloj ekstremistësh në Australi. Por ne nuk kemi përjetuar kurrë diçka të tillë këtu në Zelandën e Re, prandaj njerëzit janë kaq të tronditur”, tha ajo për Zërin e Amerikës në një intervistë telefonike.
Christchurch, ku ndodhën sulmet, ka një komunitet të vogël mysliman prej rreth 1,000 njerëzish. Myslimanët përbëjnë afërsisht një përqind të popullsisë së Zelandës së Re prej 5 milion banorësh.
“Isha në punë kur mësova për ngjarjen”, tha Mohammed Basharati, mysliman kurd nga Irani, i cili jeton në Christchurch. “Menjëherë mendova se ishte një akt ekstremistësh islamikë, sepse kurrë nuk prisnim që këto lloj krimesh të urrejtjes të ndodhin në Zelandën e Re”, u shpreh ai për Zërin e Amerikës.
Barashati shtoi se që kur kishte shkuar për të jetuar në Zelandën e Re gati dy dekada më parë, ai nuk kishte përjetuar asnjë lloj diskriminimi për shkak të besimit të tij./Opinion.al
