Kur kanë kaluar tri ditë nga vrasja e Angjelin Shkambit, Policia ende nuk ka rënë në gjurmët e autorit të shpallur në kërkim, Artan Koçeku. Me dhjetëra forca policie janë vënë në kërkim të autorit të dyshuar, por deri më tani nuk ka diçka konkrete.
Megjithatë, forcat e Policisë kanë disa dyshime mbi vendndodhjen e autorit të vrasjes së 35-vjeçarit për shkak të një borxhi. Sipas burimeve policore, dyshohet se Koçeku mund të jetë fshehur në malet e Dukagjinit.
Uniformat blu nuk kanë një informacion të saktë në lidhje me vendndodhjen e autorit të dyshuar, por kanë dyshim se mund të jetë fshehur këtë zonë. Këto dyshime vijnë për shkak se Koçeku është nga fshati Pog i Dukagjinit. Terreni i thyer malor, por edhe njohja e gjithë zonës në mënyrë perfekte, bëjnë që policia të dyshojnë se Koçeku mund të jetë i fshehur pikërisht atje.
Edhe për disa ngjarje të tjera të ndodhura në vitet e kaluara, autorët që ende nuk janë zbuluar dyshohet se qëndrojnë të fshehur në shpella apo edhe fshatra të thella, ku nuk ka lëvizje dhe është e vështirë për t’i gjetur.
E njëjta gjë mendohet se ka ndodhur edhe me Koçekun. Vrasja e Angjelin Shkambit ndodhi te varrezat e Stom Golemit rreth orës 11:00 të 17 dhjetorit. Shumë pranë ndodhet rruga, e cila të çon drejt Dukagjinit nga ana e lumit Kir në aksin Shkodër-Mali i Shoshit.
Rruga në malin e Shoshit është e vështirë për t’u kaluar me mjete për shkak të trashësisë së borës, por një mundësi është që autori i dyshuar të ketë ecur në këmbë në shtigje. Vëmendja është përqendruar në Dukagjin për Artan Koçekun, por nuk përjashtohet që mund të fshihet edhe në ndonjë vend tjetër në Shkodër apo të ketë kaluar kufirin.
Shkambi u gjet pa shenja jete në makinën e tij te varrezat e Stom Golemit të qytetit të Shkodrës, pasi ishte qëlluar me tre plumba, dy në kokë dhe një në shpatull. Sipas burimeve policore, autori i dyshuar Artan Koçeku dhe viktima kanë pasur një konflikt ditët e fundit për një borxh.
Sipas burimeve, autori i kishte rreth 30 mijë euro viktimës. Këto para ishin borxh, sipas Policisë, për shkak të pazareve të drogës mes njëri-tjetrit për disa parcela me rreth 100 mijë rrënjë kanabis sativa në Dukagjin të asgjësuara nga Policia. Artan Koçeku kishte dalë me leje nga burgu i Peqinit për shkak se vuante dënimin atje për disa vjedhje dhe një atentat ndaj një punonjësi Policie të Shkodrës.
Gjatë këtyre ditëve, autori i dyshuar dhe viktima kanë biseduar në telefon me njëri-tjetrin lidhur me borxhin, deri sa kanë lënë vendin e takimit më 17 dhjetor te varrezat e Stom Golemit, ku ndodhi edhe vrasja./S.Nikshiqi/
Burimi: Panorama
