Një person ka mbetur i vdekur pasi është qëlluar me armë zjarri mbrëmjen e sotme në rrugën “Xhanfize Keko” në zonë e Kinostudios.
Viktima i identifikuar si Santiago Malko, 26 vjeç, është qëlluar brenda një makine e cila ishte në ecje. Nga të dhënat bëhet me dije se viktima është një ish-policë, i cili ka punuar në strukturat e rendin dhe më pas është dorëhequr.
Policia ka marrë në pyetje dëshmitarët të cilët ndodheshin në vendngjarje në momentin e atentatit. Ata janë shprehur se makina e 26-vjeçarit tip BMW X5 është qëlluar nga një furgon i bardhë i cili i ka prerë rrugën dhe më pas është hapur zjarr ndaj të riut.
Ndërkohë, sipas policisë një nga autorët e dyshuar të vrasjes është me inicialet D.A. Mendohet se në furgonin prej nga u qëllua Malko kanë qenë më shumë se një person dhe janë larguar drejtim të fshatit Ferraj, ku dhe kanë djegur mjetin e tyre, tip “Mercedes-Benz”.
Dyshohet se Malko ka lidhje me një grup kiminal i cili vepron në kryeqytet. Në vitin 2016 ai ka qenë i përfshirë në një konflikt me vëllezërit Vlashi. Në atë kohë, konflikti ka qenë për bastet sportive. Ende nuk është e qartë nëse atentati i sotëm ka lidhje atë ngjarje apo jo.
Njoftimi i policisë
Sonte rreth orës 22:20, në rrugën “Xhanfize Keko”, persona ende të paidentifikuar kanë qëlluar me armë zjarri drejt një automjeti në lëvizje tip “BMW”. Për pasojë ka humbur jetën një i ri, 26-vjeçari S.M. Autorët dyshohet se janë larguar në drejtim të fshatit Ferraj, ku dhe kanë djegur mjetin e tyre, tip “Mercedes-Benz”.
Shërbime të shumta policore kanë ngritur disa pika kontrolli në kryeqytet dhe janë vënë në ndjekje të autorëve. Ndërkohë, ekspertët e kriminalistikës po mbledhin prova në vendngjarje, që do të ndihmojnë hetimin.
Policia ka nisur të shoqërojë persona që mund të kenë dijeni për rrethanat e krimit. Specialistë nga Sektori për Krimet e Rënda në Drejtorinë Vendore të Policisë Tiranë janë angazhuar si pjesë e grupit të posaçëm hetimor për zbardhjen e ngjarjes dhe vënien para përgjegjësisë ligjore të autorëve. Policia e Shtetit fton këdo që ka dijeni për rrethanat e krimit të telefonojë falas në numrin 112! /Opinion.al E.Xh.
