Tri ditë pas ngjarjes së rëndë të ndodhur në lagjen Shkozë të Tiranës, ku një 28 vjeçar vrau më thikë komshiun e tij, policia ka bërë të mundur zbardhjen e ngjarjes, e cila ashtu sikurse Opinion.al zbardhi ditën e djeshme, kishte si burim hatërmbetjen e autorit Ergest Zhupani ndaj 40 vjeçarit Arenc Liço, i cili atë ditë kishte ditëlindjen e djalit të tij të vetëm dhe autori i kishte kërkuar llogari pse nuk e kishte ftuar në gëzimin e tij.
Arenc Liço në mbrëmje vonë po pinte në një lokal ngjitur me apartamentin e tij.
Ergest Zhupani, komshi me viktimën pasi e ka parë në lokal, i ka shprehur hatërmbetjen e tij pse Liço nuk e kishte ftuar në ditëlindjen e djalit.
Një kthim fjale nga ana e Liços ka bërë që shpejt midis dy shokëve të nis një konflikt që ka kaluar në dhunë fizike, fillimisht me përdorimin e tavllave deri në goditjen me thikë nga ana e Zhupanit.
Kjo ka qenë edhe skena e parë nga dëshmitarët, të cilët në Polici janë shprehur se e kanë pasur të pamundur të ndalojnë sherrin.
“Arenci sapo ishte kthyer nga një festë ditëlindjeje. Kishte ditëlindjen e djalit, që e kishte pikë të dobët dhe ia festonte gjithmonë. Kishte pirë pak aty dhe erdhi te lokali i ‘Rrushit’, ku mblidheshim thuajse çdo natë. Aty ishte edhe Ergesti, që ai e kishte komshi prej vitesh. Debati mes tyre nisi se Ergesti i foli sikur i kishte ngelur qejfi pse s’e kishte ftuar edhe atë në ditëlindjen e djalit”,-kanë rrëfyer dëshmitarët.
Fakti që ishin të dy trupmëdhenj e bëri të pamundur ndalimin e sherrit.
“Fillimisht ata nisën të ofendojnë njëritjetrin nga tavolina në tavolinë. Ia lamë pijes dhe menduam se do mbyllej me aq. Por jo, ata u ngritën në këmbë dhe filluan të gjuajnë njëritjetrin me çfarë mundën. Me grushte, me tavlla, me gjithçka. Ne ishim 7-8 veta aty atë natë, por nuk i ndaluam dot, sepse Ergesti ishte bërë shumë i dhunshëm. Ata janë të dy trupa të mëdhenj dhe nuk i ndanim dot”, tha njëri nga dëshmitarët.
Ndërsa një tjetër tha ka parë të dyshuarin kur goditi me Arenc Liçon, por të gjithë aty menduan se ai u plagos.
“Siç ishin duke goditur njëritjetrin, Ergesti merr një thikë në tavolinë dhe e gjuan Arencin në gjoks. Ai iku me vrap, doli nga lokali dhe u zhduk. Ndërsa Arenci u shtri i gjakosur. Shkuam me të në spital. Menduam se do të shpëtonte se vetëm një goditje kishte. Por nuk ia doli. Thika e kishte goditur në zemër”
