Konflikti për pronën dhe dyshimet për pazaret në parcelat me kanabis kanë çuar në vrasjen e një 31vjeçari. Viktima është shtetasi Gjokë Arra nga fshati Gjuraj i njësisë Pult në Dukagjin. Ngjarja ndodhi dje rreth orës 10:15, kur 31-vjeçari ka mbetur i vrarë me armë zjarri. Autorët e dyshuar të kësaj ngjarjeje sipas Policisë janë vëllezërit Çesk e Luigj Bludaj, përkatësisht 37 dhe 31 vjeç. Të dy të dyshuarit janë banues në të njëjtin fshat me viktimën. Nga të dhënat që disponon grupi hetimor, bazuar edhe në dëshmitë e banorëve, fillimisht mes dy vëllezërve të dyshuar si autorë të vrasjes, Çesk e Luigj Bludaj, dhe viktimës Gjokë Arra ka nisur një debat. Pasi palët kanë fyer njëri-tjetrin, njëri prej vëllezërve dyshohet se ka marrë armën e zjarrit automatik dhe ka qëlluar në drejtim të 31 vjeçarit duke e lënë të vdekur në vend.
Ende nuk janë shumë të qarta motivet e ngjarjes, por policia bën të ditur se konflikti që ka çuar në vrasjen e të riut ka ardhur për arsye pronësie. Burime nga grupi hetimor bënë të ditur se vrasja e 31 vjeçarit ka ardhur pas debateve për parcelat e mbjella me kanabis. Dyshohet se njërës palë policia e Shkodrës, gjatë aksioneve në Dukagjin, i ka asgjësuar mijëra rrënjë kanabis, ndërsa palës tjetër jo. Për këtë shkak, dyshohet se mes palëve kanë nisur edhe debatet duke akuzuar njëritjetrin se kishin “spiunuar” në polici parcelat e mbjella, çka përfundoi deri në vrasjen e djeshme. Ende nuk është bërë e qartë nëse kjo pistë është shkaku i vërtetë pasi zyrtarisht Policia konfirmoi se shkak është pronësia, pa specifikuar për çfarë bëhej fjalë.
Por burimet nga grupi i hetimit thanë se dyshimet në lidhje me pistën e mësipërme janë të forta. Ajo që ua bën të vështirë uniformave blu vërtetësinë për shkaqet e konfliktit është se parcelat me kanabis dyshohet se kanë qenë të mbjella në toka pa pronarë, por që administroheshin nga ana e tyre. Policia ka bërë të ditur se detajet e kësaj ngjarjeje të rëndë do të jepen pas verifikimeve dhe hetimeve të bazuara edhe në fakte. Policia e Shkodrës sapo ka marrë njoftimin për vrasjen e 31 vjeçarit Gjokë Arra, është nisur drejt vendit të ngjarjes në ndjekje të dy vëllezërve. Mësohet se drejt Dukagjinit janë nisur forcat policore të komisariatit Shkodër, si dhe dy grupe të Forcave të Ndërhyrjes së Shpejtë bashkë me grupin hetimor, për të bërë të mundur kapjen e dy vëllezërve Bludaj, por edhe zbardhjen e shkaqeve të vrasjes së 31 vjeçarit në fshatin Gjuraj. Nga Shërbimet e Drejtorisë dhe Komisariatit Shkodër janë ngritur pikat e kontrollit në hyrje të zonës dhe janë në ndjekje të autorëve. Sot policia njoftoi arrestimin e nje prej autoreve, pikerisht Luigj Bludaj. /Panorama
