Një lajm shumë i rëndë në fillim të Vitit të Ri. Një ditë më parë, një krim brenda familjes tronditi Sarandën, ndërsa sot një tjetër vrasje e dyfishtë u regjistrua në fshatin Drishtë të Shkodrës.
Burime nga policia lokale bëjnë të ditur se dy vëllezërit Abdulla dhe Skënder Shkami 50 dhe 40 vjeç, janë ekzekutuar me armë zjarri pranë shtëpisë së tyre në fshatin Drishtë. Sipas policisë së Shkodrës, dyshohet se vrasja ka ndodhur për motive banale, ndërsa autori është fqinji i viktimave, i cili u ka zënë pritë dhe më pas ka qëlluar me breshëri automatiku në drejtim të vëllezërve Shkami, duke i lënë të vdekur në vend.
Skënder Shkami ndodhej në shtëpinë e vëllait të tij, pasi kishte ardhur nga Anglia, për të kaluar festat pranë familjes. Vëllezërit janë vrarë në distancë nga njëri-tjetri. Mësohet se autori i vrasjes është 37vjeçari E.D, i njohur si person me precedentë penalë.
Thuhet se 37- vjeçari ka kërkuar për nuse vajzën njërit prej vëllezërve Shkami dhe i fyer nga refuzimi i tyre, u ka zënë pritë pranë shtëpisë, duke i qëlluar me breshëri plumbash. Një tjetër sfond hetimesh mendohet të jetë edhe ai fetar, pasi në këtë zonë është shumë e theksuar dasia myliman katolik. Deri tani janë marrë në pyetje një numër i madh familjarësh.
