Emisioni “Opinion” gjatë kësaj jave ka patur në vëmendjen e tij një sërë temash, e normalisht që ka mbizotëruar aktualiteti, i cili duket se merr edhe vëmendjen më të madhe nga audienca. Nga emisioni i të hënës e deri të enjten më poshtë ju sjellim të gjitha audiencat, si edhe emisionin më të ndjekur të javës.
Mbrëmjen e të hënës (5 mars 2018) në emisionin “Opinion” u fol për grabitjet që kanë ndodhur ditët e fundit në disa qytete të vendit dhe për vrasjen që tronditi Shqipërinë në Fier, ku grabitësit vranë Agur Vrenozin. Ky ishte emisioni më i ndjekur i javës, pasi maksimalja u shënua 47.6% dhe audienca mesatare ishte 36.3%.
Mbrëmjen e së martës në emisionin ‘Opinion’ u diskutua për zgjedhjet në Itali dhe surprizat që ato sollën duke përmbysur partitë e vjetra tradicionale; “Zgjedhjet, kohë përmbysjesh”, ishte tema e emisionit e cila u zgjerua nga të ftuarit edhe për vende të tjera në Ballkan. Audienca mesatare atë mbrëmje ishte 25.8% dhe ajo maksimale shkoi në 32.0%.
Të mërkurën në mbrëmjen në emisionin “Opinion” u fol për paraqitjen e grave dhe vajzave në vite: “Si ka ndryshuar bukuria në vite”, ishte pyetja drejtuar një paneli të zgjeruar dhe të mbizotëruar nga vajza dhe gra. Por duket se ky ishte emisioni më pak i ndjekur i kësaj jave, pasi audienca mesatare ishte 25.3% dhe ajo maksimale 35.2%
Të enjte më 8 mars 2018 në emisionin ‘Opinion’ ishte i ftuar kreu u Partisë Demokratike Lulzim Basha. Basha ishte përball gazetarit Blendi Fevziu për rreth dy orë dhe intervista u përqendrua më tepër në investigimin e publikuar nga gazeta amerikane “Mother Jones”, ku thuhej se PD ka paguar për lobim në Amerikë një shumë prej 675mijë dollarësh. Audienca mesatare në këtë emision ishte 26.7% dhe ajo maksimale 34.1%.
Në bazë të këtyre të dhënave duket se emisioni që dominoi në këtë javë për nga audienca ishte ai i ditës së hënë, ku u fol për një temë nga kronika e zezë “vrasjen e Agur Vrenozit” dhe emisioni më pak i ndjekur është renditur “bukuria në vite”. Emisioni i të enjtes ku i ftuar ishte kreu i PD-së Lulzim Basha është renditur si i dyti më i ndjekuri i kësaj jave./G.Z-opinion.al
