Viktima e mbrëmjes së të mërkurës në Durrës, Xhevahir Brasha, baba i tre fëmijëve rezulton se aktivitetin e tij ta ketë ushtruar në Londër, ku ishte emigrant prej 20 vitesh.
Dhe pista kryesore e hetimit për zbardhjen e vrasjes së tij është ajo e një konflikti të ndodhur në Angli.
Burime nga grupi hetimor bënë me dije për Televizionin Klan se po hetohet një konflikt i hershëm që 42- vjeçari ka patur në kryeqytetin britanik me disa bashkëfshatarë të tij nga Hasi.
Konflikti në atë kohë degradoi në dhunë fizike mes palëve dhe sipas informacioneve paraprake që disponon grupi hetimor, rezulton se viktima i kishte prerë veshin njërit prej personave me të cilët kishte konflikt.
Policia bën me dije se mosmarrëveshjet mes palëve kanë qenë të vazhdueshme vitet e fundit.
Rezulton se personat e palës tjetër janë identifikuar nga policia dhe po punohet për t’i shoqëruar dhe për t’i marrë në pyetje.
Në vrasjen e Xhevahir Brashës policia nuk përjashton mundësinë që të jenë përdorur vrasës me pagesë.
Burime nga Policia e Shtetit bëjnë me dije se për zbardhjen e plotë të ngjarjes do të bashkëpunohet dhe me autoritet policore britanike.
Tv Klan
