Efektivi i policisë, Alban Trimi, arrestuar pas vrasjes së Elton Çiços në Bllok nën akuzën e pengimit për të zbardhur të vërtetën e krimit do të qëndrojë në burg pa afat. Gjykata e Apelit vendosi të rrëzojë kërkesën e Trimit për ndjekjen në liri.
Oficeri i policisë u prangos pas vrasjes së Çiços së bashku me mjekun stomatolog Redjan Rraja, të cilët ishin në shoqërinë e Çiços kur ai u qëllua për vdekje. Trimi dhe Rraja dyshohet se kanë tentuar të fshehin armën dhe telefonat e viktimës, direkt pas vrasjes. Sipas prokurorisë veprimet e dyshimta të tyre janë kapur nga kamerat e sigurisë së lokalit.
Edhe në këtë seancë, prova më e fortë e Prokurorisë ishin filmimet e kamerave në lokalin ku ndodhur vrasja. Në to shihet qartë që Alban Trimi merr çantën e krahut të viktimës. Rikthehet pas disa minutash ndihmon mjekun Rraja të sistemojnë trupin e Elton Çiçës dhe më pas merr pistoletën dhe zhduket nga aty.
Për këtë krim policia ka identifikuar autorët dhe prej 10 ditësh është në kërkim të Jani Aliajt dhe Renato Milloshit si persona të përfshirë direkt në vrasjen e Çiços mbrëmjen e 1 Majit në lokal “De Niro” në zonën e Bllokut.
