Tre shqiptarë janë vënë në akuzë për vrasjen makabre të Bledar Terpollarit rreth 3 javë më parë në Greqi, të cilit iu pre koka. Dy janë të arrestuar tashmë dhe një i tretë dyshohet se ndodhet në Shqipëri.
Hetuesit kanë mundur të zbardhin këtë ngjarje të rëndë, bazuar edhe në dëshminë e një bariu shqiptar, tashmë të arrestuar, i cili ishte prezent në ekzekutimin makabër.
Sipas mediave greke, janë dy shqiptarë 28-vjeçarë që po mbahen të arrestuar në policinë e Igumenicës, njëri prej të cilëve është dëshmitari. Të dy u arrestuan fillimisht për hyrje të paligjshme në Greqi, por tashmë përballen me akuzat për bashkëpunim në vrasje.
Nuk është përcaktuar ende dhe nuk është shumë e qartë nëse dëshmitari ka qenë i përfshirë drejtpërdrejt në vrasjen mizore. Kurse personi i tretë ndaj të cilit është lëshuar një urdhër-arresti është një tjetër shqiptar, por që mendohet se është larguar nga Greqia dhe ndodhet në Shqipëri.
Policia greke i disponon të gjitha të dhënat, por nuk publikon emrat e tyre për arsye të hetimit. Vrasja e Bledar Terpollarit ishte porositur nga Shqipëria nga një person që drejton trafikun e drogës në Greqinë Veriore.
Ai kishte kërkuar që koka e Terpollarit të shkonte në Shqipëri. Vrasja ka ndodhur pasi viktima kishte mbajtur një pjesë të parave nga shitja e drogës.
