Një ditë pasi mediat greke publikuan lajmin e vrasjes makabër të një shqiptari në Igumenicë mësohet identiteti dhe origjina e tij.
Bledar Kujtim Terpollari është nga fshati Backë e Skraparit. Ai është rritur në një familje të varfër me 7 fëmijë, ku Bledari ishte fëmija i dytë. “Njihej si një person problematik që largohej shpesh nga fshati i lindjes”, bën të ditur TV News 24, referuar dëshmisë së banorëve.
Të njëjtat burime bëjnë me dije se prej 7 vitesh Bledari lëvizte shpesh në drejtim të Sarandës e ka dyshime se ai përdorej nga persona të tjerë, për të trafikuar lëndë narkotike nga Saranda në shtetin grek.
Ndërsa nga burgu i Drenovës, mësohet se Tërpollari ka vuajtur dënimin 8 muaj në këtë burg për vjedhje dhe ishte liruar në vitin 2010.
Ndërkohë nga policia e Skraparit bëhet me dije se Tërpollari ishte arrestuar tre herë për vjedhje të ndryshme.
Shqiptari i masakruar në fshatin Gliki të Greqisë është qëlluar me një plumb që i është gjetur në mushkëri, dhe më pas i është prerë koka.
Mediat greke, bazuar në dëshmitë e banorëve të zonës, raportojnë se shqiptari ndodhej prej dy muajsh në Igumenicë dhe se po kërkonte punë si bari. Nuk ka ende asnjë të arrestuar nga policia greke për këtë vrasje makabër.
