Ndonëse ende nuk ka prova konkrete për të çuar në zbulimin e autorëve të vrasjes së Aleksandër Ndokës një ditë më parë, policia është duke shqyrtuar disa pista paraprake gjatë ekspertizës që po drejtohet nga specialistë të Krimeve të Rënda në Policinë e Shtetit, kryesuar nga drejtori i kësaj drejtorie, Niko Brahimaj.
Sipas “Panoramës” që citon burime nga grupi i hetimit thuhet se është duke u hetuar në disa pista, por duket se dy më kryesoret janë ato që lidhen me detyrat që vëllai i ish-deputetit ka patur në administratë, por edhe me konflikte të mëparshme të djemve të tij, të cilët janë njohur si të përfshirë në disa ngjarje kriminale dhe lëviznin të armatosura.
Megjithatë sipas të njëjtit burim nuk përjashtohet as ndonjë konflikt i mundshëm i vetë viktimës.
Kush ishte Aleksandër Ndoka
Aleksandër Ndoka, 48-vjeç, i ekzekutuar të shtunën në mëngjes pak metra larg banesës ishte baba i katër fëmijëve, 2 djem dhe 2 vajza.
Vajzën më të madhe e kishte të martuar, ndërsa më të voglën 8 vjeç.
Përveç angazhimit të tij si këshilltar në Këshillin Bashkiak të Lezhës, 48-vjeçari kishte në pronësi një lokal pranë banesës së tij, si dhe një biznes duralumini.
Gjithashtu, u bë me dije se djali i tij, Samuel Ndoka u arrestua nga policia në fund të muajit tetor, i akuzuar për “Plagosje e lehtë me dashje”, “Prodhim dhe mbajtje pa leje të armëve luftarake dhe municionit”, “Kanosje apo dhunim ndaj pjesëmarrësve në zgjedhje”.
Vëllai i ish-deputetit të PS-se, ishte këshilltar në Këshillin Bashkiak të Lezhës, përfaqësues i “Partia Rruga e Lirisë”. Ai e mbante këtë detyrë që prej vitit 2015, madje në mbledhjen e fundit të zhvilluar ai ishte i pranishëm dhe ngriti zërin për pagesat që nuk u janë dhënë kryepleqve.
Sipas të dhënave, në vitin 2016 Aleksandër Ndoka ka punuar si jurist në Këshillin e Qarkut. Ndërsa nga viti 2013 deri në vitin 2015 ka punuar si jurist në Hipotekën e Lezhës. Së fundmi, rreth dy muaj më parë mësohet se Aleksandër Ndoka ishte emëruar si kryeinspektor i IKMT-së për Veriun.
Grupi i hetimit nuk përjashton dyshimin se ngjarja mund të ketë lidhje me detyrat e Ndokës. Por më e mundshmja vlerësohet ndonjë konflikt i akumuluar që në periudhën kur ai ka punuar në Hipotekë. Në qarkun e Lezhës, mjaft prona, kryesisht në bregdet, janë në procese gjyqësore dhe në konflikt mes pronarësh.
