Një ditë pas atentatit që i mori jetën 48-vjeçarit Armando Gjini, policia nuk ka asnjë të dyshuar. Hetuesit kanë përcaktuar tre pistat e para për atentatin ndaj ushtarit të Met Kananit, të hënën në qendër të qytetit të Rrëshenit. Mësohet se familja e Gjinit është e përfshirë në një gjakmarrje në të kaluarën.
Po ashtu policia po heton dhe për pjesën e borxheve si dhe e kaluara e tij në Belgjikë. Policia ka shoqëruar disa persona të cilët pasi janë marrë në pyetje janë lënë të lirë.
Armando Gjini po lëvizte me makinë bashkë me dy fëmijët dhe bashkëshorten e tij, kur dy persona kanë qëlluar me armë zjarri duke e lënë të vdekur. 48-vjeçari kishte dy identitete, Armando Gjini dhe Tonin Gjini.
Një orë me pas në fshatin Gziq të Mirditës u gjet një makine fuoristradë e djegur, që dyshohet të jetë përdorur nga autorët e krimit. Tre muaj më parë viktimës i kishin vendosur tritol në makinë, e cila shpërtheu pasi ai ishte larguar për të dërguar fëmijët në shkollë. Armando Gjini u arrestua me 12 maj 2018 si pjesë e grupit të baronit të drogës, Met Kanani.
Në kuadër të operacionit ‘Precizioni’ Gjini u arrestua së bashku me 37 persona të tjerë dhe u sekuestruan 8 ton drogë. Por 4 ditë pas arrestimit, Gjini u lirua nga burgu./ Opinion.al
