Presidenti Bajram Begaj ka reaguar lidhur me vrasjen e tre grave dhe plagosjen e tre të tjerave nga Dan Hurtra, i cili u arrestua pasditen e sotme.
Nëpërmjet një postimi në rrjetet sociale, kreu i shtetit ka dënuar krimet e ndodhura sot, teksa u kërkon organeve ligjzbatuese të veprojnë sipas ligjit ndaj vrasësit 40-vjeçar.
Ndër të tjera Begaj shkruan “Një shoqëri ku gruaja vritet, dhunohet, keqtrajtohet, nënshtrohet, është një shoqëri që nuk duhet të pushojë së vepruari deri sa ky realitet të ndryshojë totalisht.”
Reagimi i Begajt
Lajmet makabre të ditës së sotme në Tiranë, ku tre gra janë vrarë e tre të tjera janë plagosur, janë tërësisht të papranueshme! I shpreh ngushëllimet e mia më të sinqerta familjeve të viktimave!
Fenomene të tilla të dhunës ekstreme apo të çdo lloj forme dhune ndaj grave nuk kanë vend dhe nuk mund të jenë pjesë e shoqërisë sonë demokratike, ku dinjiteti dhe jeta e njeriut janë vlera të larta dhe të pazëvendësueshme.
Dënoj ashpër të gjitha ngjarjet e dhunës në familje dhe kërkoj që organet ligjzbatuese të veprojnë me forcën e ligjit. Një shoqëri ku gruaja vritet, dhunohet, keqtrajtohet, nënshtrohet, është një shoqëri që nuk duhet të pushojë së vepruari deri sa ky realitet të ndryshojë totalisht.
