Autoritetet në Greqi kanë vijuar hetimet për të zbuluar vrasjen e tifozit 29 vjeçar në Athinë, i cili u vra me thikë pranë stadiumit të AEK-ut.
Sipas mediave greke, mësohet se një shqiptar është mes 5 të dyshuarve kryesorë për vrasjen. Ndërkohë 4 të tjerët janë një kroat dhe 3 grekë.
Gjatë arrestimit, shqiptarit dhe kroatit iu gjetën thika me gjak, dy nga grekët e dyshuar janë huliganë të një tifogrupi, të arrestuar edhe më parë, dhe me precedentë të rëndë kriminalë.
Videot amatore nga sulmi shfaqën dhjetëra të rinj duke vrapuar pranë stadiumit me shkopinj dhe shufra hekuri në dorë, ku shpërthyen bomba me benzinë dhe fishekzjarrë. Dhjetë persona u lënduan dhe katër përfunduan të shtruar në spital.
Ndërkohë policia vazhdon me operacionin dhe hetimet për të zbardhur vrasjen e tifozit 29-vjeçar.
