Është vetëdorëzuar pasditen e sotme në policinë e Shkodrës 33 – vjeçari, Eduart Hulej, i akuzuar për vrasjen e 24 – vjeçarit Luigj Gjergji.
Bëhet fjalë për një ngjarje të ndodhur 9 Tetor të 2015 –ës, ku 24 – vjeçari Gjergji mbeti viktimë i një sulmi me armë teksa po udhëtonte në aksin Vau i Dejës – Bushat.
Ai u ekzekutua nga dy persona për motive të dobëta.
Njëri prej autorëve, Akil Gradeci, u arrestuar pak pas ngjarjes nga policia, ndërsa Eduart Hulej arriti të largohej dhe ishte shpallur në kërkim me vendim të Gjykatës së Shkallës së Parë në Shkodër, që kishte vendosur masën e sigurisë “arrest me burg”.
Menjëherë pas vetëdorëzimit efektivët e policisë kanë ekzekutuar urdhrin për 33 – vjeçarin mbi të cilin rëndojnë veprat penale, “Vrasje me paramendim” dhe “Armëmbajtje pa leje”.
Ngjarja:
Luigj Gjergji, 24 – vjeçari që mbeti viktimë i një sulmi me armë teksa po udhëtonte në aksin Vau i Dejës – Bushat, u vra për motive të dobëta. Këtë ia rrëfeu policisë njëri prej autorëve, Akil Gradeci, 24 – vjeç, banues në fshatin Shkjezë të Vaut të Dejës. Ai u vu në pranga nga uniformat blu vetëm pak orë pas ngjarjes.
Në këtë krim, ai pati si bashkëpunëtor 33 – vjeçarin Eduart Hulej, nga fshati Plezhë i Vaut të Dejës, i shpallur në kërkim nga policia.
Gradeci pretendonte se viktima i kishte ngacmuar të motrën para disa vitesh dhe për këtë ai deshi të hakmerrej. Bashkë me mikun e tij, thuri planin për t’i zënë pritë të riut, teksa ai po kthehej nga aeroporti “Nënë Tereza”, pasi kishte përcjellë të ëmën për në Greqi.
Dy autorët kishin ndjekur të gjitha lëvizjet e 24 – vjeçarit dhe rreth orës 02:10, duke u gdhirë e premte, i zunë pritë pranë vendit të quajtur Karburant “Palushaj”, në aksin Vau Dejës – Bushat.
Zbrazën mbi të një breshëri me plumba dhe u larguan nga vendngjarja. Automjeti që drejtonte 24 – vjeçari Gjergji përfundoi në një kanal në anë të rrugës, ndërsa vetë ai gjeti vdekjen e menjëhershme.
Dinamikën e ngjarjes policia e verifikoi edhe nga regjistrimet e kamerave të sigurisë së një banese që ndodhej në anë të rrugës Vau i Dejës – Bushat.
