Mëngjesin e djeshëm Shqipëria u trondit nga vrasja e 25-vjeçarit Klodian Rasha nga një efektiv policie, pasi nuk i ishte bindur urdhrit për të ndaluar.
Një ditë pas ngjarjes së rëndë, shokët e të riut e përshkruajnë atë si njeri shumë të qetë dhe kurrë nuk ka pasur armë.
Njëri nga shokët rrëfen se pak momente para se efektivi i policisë ta qëllonte me dy plumba, 25-vjeçari ka qenë me atë deri në orën 11:00 dhe në orën që është përballur me policinë ka dalë për të blerë cigare në një kioskë që rri hapur 24 orë në “Don Bosko”. Ai thotë se Klodiani nuk kishte probleme serioze me shëndetin dhe se ishte normal.
“Unë jam shoku i Klodiani. Klodianin, e kemi pasur 20 vjet shok. Ka qenë njeri që ka gëzuar respektin çdo njeriu që e ka takuar të paktën një herë në jetë dhe natën që ka ndodhur ngjarja Klodiani ka qenë me ne deri në orën 11:00 të natës. Dhe aq sa jam unë tani i armatosur ka qenë edhe Klodiani. Nuk ka pasur kurrë armë në jetën e tij. Familja e di më mirë që ai as në shtëpi, as në lagje kurrë në jetën e tij nuk ka pasur armë. Nuk ka qenë njeri që mund të cilësohej me rrezikshmëri. Ai ka dalë jashtë orës për të blerë cigare në një kioskë që rri 24 orë hapur, tek ‘Don Bosko’. Nuk ka qenë person me rrezikshmëri. Ka qenë natyrë shumë e qetë, i respektonte njerëzit. Veprimin e policisë e konsideroj të paligjshëm. Brenda një kohe të shkurtër janë dhënë tre njoftime të ndryshme. Arma nuk i përkiste Klodian Rashës. Ishte me ne deri në orën 11. Ai nuk kishte probleme, dilte nga shtëpia deri në lagje. Nuk kishte probleme, të gjithë e respektonin. Më shumë se kemi humbur shokun na dhemb që është njollosur. Si çdo njeri që mund të merrte ilaçe për diçka të vogël, nuk kishte gjë serioze. Ishte njeri shumë normal. Ne nuk jemi thirrur për të bërë deklaratë. Ne jemi të partë që do të protestojmë”, thotë ai.
Klodjan Rasha u qëllua nga një efektiv policie gjatë orëve të para të mëngjesit të djeshëm. Pas ekzekutimit të të riut, Policia e Shtetit njoftoi zyrtarisht se viktima e kishte kërcënuar efektivin me një send të fortë që në dukje ishte armë zjarri dhe se efektivi i policisë në kushte vetëmbrojtje dhe errësire e qëlloi me armë.
Po ashtu, në shumë media qarkulloi lajmi se në afërsi ku ndodhi ngjarja u gjet dhe një pistoletë që dyshohej se i përkiste 25-vjeçarit. Por ky version u rrëzua nga familjarët të cilët deklaruan me bindje se djali i tyre nuk ka pasur armë, ndërsa banorët e tjerë kanë deklaruar se rruga ka ndriçim. Në këtë mënyrë bie poshtë versioni i policisë, e cila deklaroi se efektivi e qëlloi të riun në kushte të errësirës.
Disa orë më vonë, Shërbimi për Çështjet e Brendshme dhe Ankesave pas hetimeve të kryera ka konstatuar se efektivi i policisë që vrau 25-vjeçarin Rasha, ka vepruar në shkelje të ligjit, pasi nuk ka qenë në kushtet e vetëmbrojtjes dhe për këtë arsye ai u arrestua./ Opinion.al
