Gjykata e Apelit ka vendosur rihapjen pjesërisht të procesit ndaj ish-efektivit të RENEA-s, Arbër Paplekaj, i akuzuar për vrasjen e Pjerin Xhuvanit në Elbasan.
Gjykata e Apelit të Juridiksionit të Përgjithshëm pranoi me 4 mars kërkesën e Arbër Paplekaj, për kryerjen e një ekspertimi kriminalistik në vendin e ngjarjes, për vrasjen e Xhuvanit. Arbër Paplekaj, është dënuar me 22 vite burg nga shkalla e parë.
Paplekaj kërkon edhe rikualifikim të veprës penale nga vrasje me dashje në vrasje në kushtet e tronditjes së fortë psikike.
Prokuroria sot pritet të japë informacione edhe për procedimin e pezulluar për personat e tjerë që kanë qëlluar me armë zjarri në vendin e ngjarjes gjatë përplasjes së grupeve të militantëve të PD e PS, mes atyre të ashtuquajtur anëtarëve të strukturës së mbrojtjes së votës dhe mbështetësve socialistë.
Gjykata e Apelit vendosi të caktojë një ekspert nga Instituti i Policisë Shkencore dhe dy ekspertë të pavarur, të cilët do të rindërtojnë skenën e krimit. Ata do të jenë përkatësisht, Arjan Hanko, pranë institutit të Policisë Shkencore, Artan Rexhepi dhe Shpëtim Buda, ekspertë të pavarur.
