Ditën e djeshme, tre fëmijët e familjes Meta ndryshuar sërish dëshmitë, duke thënë se ishte Hygerta ajo që ka qëlluar mbi të atin, Pëllumb Metën.
Mirëpo, ky ndryshim nuk ka ndikuar tek grupi hetimor, të cilët vijojnë të jenë të bindur se mbi 50-vjeçarin ka qenë djali i madh, Hysen Meta.
Të paktën nga veprimet proceduriale të deritanishme rezulton se vrasësi i dyshuar është Hysen Meta, djali i madh i Pëllumbit. E vetmja gjë ende e paqartë për grupin hetimor mbetet motivi kryesor i krimit.
Gjithsesi dhuna në familje, qoftë dhe vetëm ajo psikologjike, e shoqëruar me episode dhune fizike të herëpashershme ndaj nënës, siç dëshmohet vetëm nga Blerina dhe vajza e saj e arrestuar, konsiderohet motiv që ka nxitur frymën e urrejtjes ndaj babait duke çuar në planifikimin e vrasjes së tij.
Pesha e përgjegjësisë nga dëshmitë dhe provat e deritanishme bie mbi Hysen Metën dhe motrën e tij Hygerta. Të dy kanë qenë të pranishëm në krim, por roli i nënës së tyre Blerina Metës, konsiderohet kyç në këtë ngjarje kriminale.
Vrasja e Pëllumb Metës ka ndodhur në datën 10 shkurt, ku djali i madh Hyseni pas tre ditësh ka bërë denoncimin për zhdukjen e tij. Pëllumbi u vra në një dhomë të shtëpisë, e më pas u gropos në kasollen e bagëtive, disa metra larg shtëpisë.
