Marokeni Ruben Saraiva, i dyshuar si autori i vrasjes së biznesmenit Ardian Nikulaj, është paraqitur këtë të hënë në Gjykatën e Lezhës, ku është zhvilluar seanca për gjykimin në themel të çështjes.
Sipas burimeve nga salla e gjyqit, janë thirrur rreth 10 persona për të dëshmuar, mes tyre xhaxhai i të ndjerit, bashkëshortja e tij, kamarieri, banakieri dhe disa persona të tjerë që dyshohet të kenë dijeni për ngjarjen.
Avokati i të pandehurit, Kujtim Cakrani, deklaroi se me këtë seancë ka nisur gjykimi i plotë mbi çështjen dhe se jo të gjithë dëshmitarët kanë informacion të drejtpërdrejtë mbi rrethanat e vrasjes. Ai theksoi se klienti i tij mohon të jetë autori i krimit.
“Kemi pyetur personat që kanë qenë në atë moment siç janë kamarieri dhe banakieri i restorantit të të ndjerit. Po vazhdojmë me pyetjen e dëshmitarëve të tjerë ku konkretisht nuk ka ndonjë gjë të re. Kjo është një çështje që do zgjasë. Janë shumë dëshmitarë. Rrethanat e ngjarjes janë duke u zbardhur dhe po pyeten dëshmitarët për aq sa kanë dijeni për rrethanat e faktit.
Edhe autorin ata nuk e njohin sepse ka qenë i kamufluar nga koka te këmbët. Është e vështirë që ta zbardhim personin, por një gjë është e sigurt që Ruben Saraiva nuk është autori i kësaj ngjarje për të cilën dëshmitë nuk e provojnë diçka të tillë”, tha Cakrani për mediat.
Seanca ka nisur në orën 09:00 dhe po zhvillohet me dyer të mbyllura, ndërsa dëshmitarët po merren në pyetje njëri pas tjetrit.
Procesi pritet të zgjasë disa orë, ndërkohë që gjykata ende nuk ka dhënë një datë për seancën e radhës./tvklan
