Në kushte të rënduara psikologjike, Shpresa Kurti, bashkëshortja e Artur Kurtit që u qëllua me thikë nga djali e kunati, ka dhënë një dëshmi për hetuesit. Edhe pse dëshmia e saj ende nuk është marrë e plotë, në ato që thotë ajo konfirmon versionin e dhënë më parë nga djali i saj Jurgeni dhe vëllai, Leonard Ristani.
Burime nga grupi hetimor thanë se në deklarimet që nëna e motra e të dyshuarve për vrasjen ka dhënë për ngjarjen, sërish mbetet e paqartë autorësia e krimit. Ajo duket se nuk e ka parë momentin e vrasjes së të shoqit, pasi sipas saj i vëllai dhe djali e kanë larguar duke e futur brenda në apartament, ndërsa ngjarja është zhvilluar në korridor.
Megjithatë, Shpresa Kurti ka treguar se ka qenë ajo e cila ka lajmëruar vëllain e djalin, për shkak të dhunës që kishte ushtruar i shoqi ndaj saj mbrëmjen e së shtunës. Ndërsa është shprehur se arsyeja e debateve mes tyre kohët e fundit, ka qenë kërkesa që ajo kishte bërë për divorc, të cilën bashkëshorti i saj nuk e pranonte.
Shpresa Kurti, e cila është drejtoreshë e filialit të një banke të nivelit të dytë në Tiranë, është konsideruar dëshmitarja kryesore e krimit në familje që ndodhi të hënën mbrëma. Por, edhe dëshmia e saj duket se nuk ka saktësuar momentin e vrasjes dhe mbi të gjitha autorësinë. Duke qenë e pranishme në momentin që ndodhi krimi, ajo ka kaluar një traumë të rëndë dhe gjatë këtyre ditëve ka qenë nën kujdesin e mjekëve.
Për këtë arsye edhe dje, dëshmia e saj nuk është marrë e plotë nga hetuesit, duke qenë se herë pas here ajo ndihej keq dhe lodhej gjatë rrëfimit të saj.
Një psikologe e Policisë së Tiranës ka qenë e pranishme gjatë marrjes në pyetje, e cila edhe dy ditë më parë ka ndjekur nga afër gjendjen e saj për shkak të traumës që ajo ka kaluar. Burimet thanë se përfshirja në ngjarjen e ndodhur të hënën në mbrëmje duket se e ka bërë të ndihet përgjegjëse.
Dy ditë më parë kanë qenë dëshmitë e dy të arrestuarve për vrasjen e 50-vjeçarit Artur Kurti, që kanë zbardhur motivet e dhunës në familje, duke lënë në pikëpyetje autorësinë. Nipi edhe daja kanë pranuar konfrontimin me viktimën dhe faktin se i kanë hequr thikën nga dora, por asnjëri nuk është i sigurt se cili e ka goditur.
Të dy kanë dhënë të njëjtin version rreth zanafillës së ngjarjes që Artur Kurti kishte shkuar në apartament me thikë në dorë për të vrarë bashkëshorten, pa e ditur se ata ndodheshin aty. Jurgen Kurti ka deklaruar para oficerëve të Policisë Gjyqësore se të shtunën në mesnatë, nëna e kishte lajmëruar se babai kishte shkuar i dehur në banesë dhe kishte tentuar të hynte me forcë. I ati kishte shkuar i dehur në banesën e tyre dhe kishte tentuar të hynte me forcë.
Për këtë arsye Shpresa Kurti kishte lajmëruar edhe vëllain e saj, Leonard Ristanin, të cilin e kishte vënë në dijeni për atë çfarë po ndodhte mes saj dhe të shoqit./Panorama
