Pas një pezullimi prej 13 muajsh, Gjykata e Krimeve të Rënda ka rinisur procesin ndaj Bledar Jambellit dhe Kristaq Lecit të cilët janë përfshirë në vrasjen e komisarit Artan Cuku.
Jambelli dyshohet si porositësi i vrasjes ndërsa Leci akuzohet si ndihmës i vrasësit, Mikel Shallari.
Gjyqi zhvillohet në mungesë të të pandehurve. Të dy ata janë kapur nga autoritetet greke dhe pasi është refuzuar ekstradimi i tyre janë lënë të lirë.
Në seancën e sotme Gjykata relatoi se përgjatë këtij viti që çështja ishte e pezulluar, policia e Fierit dhe Beratit kanë ushtruar kontrolle në banesat e tyre, pa i gjetur. Ky fakt është konsideruar si qesharak nga avokati i komisarit Cuku pasi sipas tij dy të pandehurit “dihen që janë liruar në Greqi” kështu që kërkimi i tyre në Fier dhe në Ballsh duket se është formal.
Kristaq Leci u arrestua më 12 gusht në Greqi me kërkesë të autoriteteve shqiptare dhe pritej që të sillej në Shqipëri për tu përballur me akuzat ndaj tij por për arsye ende të paqarta është lënë i lirë. Refuzimi për ekstradim dhe më pas lirimi i Lecit nga autoritetet Greke është bërë për arsye të paqarta.
Më herët Gjykata e Lartë greke kishte refuzuar ekstradimin e Bledar Jambellit, personi që dyshohet se ka porositur vrasjen e Cukut. Sipas gjykatës ai nuk do të ekstradohej pasi në Shqipëri i rrezikohej jeta dhe më pas u la i lire.
Komisari Artan Cuku u ekzekutua më 8 prill 2017 nga Mikel Shallari pranë banesës së tij në Tiranë. Ka qenë vetë Shallari që ka rrëfyer në Gjykatën e Krimeve të Rënda të gjithë ngjarjen e plotë duke zbuluar edhe emrin e porositësit, Bledar Jambelli i cili u largua nga Shqipëria pas vrasjes së Cukut./Opinion.al
