Personi që policia ka shpallur në kërkim për vrasjen e Jurgen Kurtit është Klodian Bane. Sipas burimeve nga policia, automjeti që është përdorur për vrasjen e Kurtit është në pronësi të Banes.
Ekspertët e policisë kanë arritur që nëpërmjet kamerave të instaluara në rrugë, të gjejnë momentin kur Bane i heq automjetit tip “Benz” targat false të cilat ia kishte venë përpara dhe gjatë krimit.
Ndërkohë, policia ka arrestuar tre personat e tjerë që dyshohet se kanë qenë në makinë atë natë. Ata janë: Elsi Levendi lindur në Athinë/Greqi dhe banues në Tiranë; Olsi Qalliaj 22 vjeç, lindur në Fier dhe banues në Patos dhe Alesio Berberi 33 vjeç lindur në Patos dhe baunes në Patos, Fier.
Elsi Levendi, ishte personi i cili ruante lëvizjet e Jurgen Kurtit dhe njoftonte anëtarët e tjerë të grupit. Ishte pikërisht 21-vjeçari personi i parë që ra në gjurmët e policisë, pasi u kap nga kamerat e sigurisë në rrugën “Zef Jubani”, aty ku mbrëmjen e 18 Marsit u ekzekutua për vdekje 26-vjeçari Jurgen Kurti.
Kështu, fillimisht autoritetet u vunë në ndjekje të Levendit. Pas krimit, ai u takua me 3 personat e tjerë dhe këta të fundit u vunë gjithashtu në përgjim.
Pistoleta TT dhe 2 makinat luksoze u gjetën në shtëpinë e Alesio Berberit. Aktualisht mësohet se autoritetet po përpiqen të zhbllokojnë telefonat e grupit. /Opinion.al
