Procedohet penalisht për “Shpërdorim detyre” gjyqtari i Gjykatës së Shkallës së Parë në Fier, Ergys Selmani, pasi ka neglizhuar vendimin për mbrojtjen e Liljana Rukos.
Policia e Fierit, ka bërë me dije, se procedimi penal ka nisur ditën e sotme dhe nga veprimet e para hetimore, rezulton se në shkelje të ligjit, gjyqtari Selmani, ka neglizhuar zbardhjen dhe dërgimin në kohë të vendimit për mbrojtjen e Rukos, institucioneve përgjegjëse.
Dy ditë më parë, Ferdinand Ruko, hodhi bashkëshorten Liljana Ruko nga kati i katërt i pallatit ku jetonin. Referuar informacioneve të publikuara në media, çifti kishte patur grindje të vazhdueshme. Mësohet se Ruko, 52-vjeç, e kishte dhunuar atë për herë të fundit në datën 4 nëntor.
Për këtë arsye viktima Liljana atë ditë ka bërë denoncim në komisariatin policisë dhe në datën 9 të muajit të kaluar gjykata e Fierit ka vendosur urdhër-mbrojtje të menjëhershëm për 43-vjeçaren. Në vendimin e gjykatësit Ergys Selmani janë 11 pika të cilat autori i krimit makabër duhet t’i respektonte.
Por pavarësisht urdhrit të mbrojtjes dhe vendimit që burri të mos i afrohej gruas më shumë se 2 metër, dy bashkëshortet jetonin në një shtëpi.
Gjithashtu, sipas këtij vendimi ai është i detyruar të paguajë çdo muaj kontribute ushqimore për dy fëmijët në vlerën e 28 mijë lekëve të reja.
Ferdinat Ruko ka pohuar se e kishte vrare gruan për faktin se ajo e kishte kallëzuar në polici për dhunën.
Procedohet penalisht edhe kryetarja e Zyrës Përmbarimore
Policia e Fierit ka nisur procedim për shpërdorim detyre edhe për kryetaren e Zyrës Përmbarimore Fier, shtetasen L.Sh, 36-vjeçe.
Nga hetimet paraprake, rezulton se kjo shtetase ka shkelur ligjin, duke mos kryer asnjë veprim përmbarimor për ekzekutimin e vendimit të urdhërit të mbrojtjes për shtetasen Liljana Ruko.
