Në Gjykatën e Krimeve të Rënda janë publikuar për herë të parë pamjet e rrëmbimit të Gazmend Çollakut, ngjarje e ndodhur më 6 janar 2016 në qytetin e Durrësit. Në video duken disa persona që rrëmbejnë Çollakun sapo ai parkoi automjetin e tij. Pamjet nuk janë shumë të qarta dhe ka vështirësi në identifikimin e personave të përfshirë.
Gazmend Çollaku u gjet një ditë pas rrëmbimit i hedhur në anë të rrugës i vrarë me armë dhe i lidhur këmbë e duar.
Dy personat e akuzuar nga Prokuroria për rrëmbimin dhe vrasjen e Gazmend Çollakut janë Denis Shtraza dhe ish-oficeri i policisë Ervin Dalipaj. Ky i fundit u vra në një atentat në Sukth të Durrësit në 25 prill 2017.
Në seancën gjyqësore të 6 korrikut, Denis Shtraza mohoi të kishte lidhje me vrasjen e Çollakut, duke thënë se me viktimën ka pasur miqësi që prej vitit 2008. /tvklan.al
