Drejtori i Policisë së Shtetit Muhamet Rrumbullaku e ka cilësuar skandaloze akuzat se policia e shtetit tentoi që të fshehë vrasjen e Egli Progës në Pogradec.
Në daljen për media, Rrumbullaku tha se ngjarja nuk ka lidhje me gjobëvenien, por është konflikt i çastit.
“Është shkuar në vend ngjarje, janë sekuestruar kamerat e ambienteve përreth, janë shoqëruar disa persona, janë kryer veprimet e hetimeve. Si rezultat i veprimeve profesionale të kryera nga grupi hetimor, u bë e mundur zbardhja dhe dokumentimi i ngjarjes. Është identifikuar autori dhe arrestuar tre të tjerë për moskallëzim krimi. Drejtoria e Policisë Korçë ka dhënë njoftimin e parë zyrtarë, që për arsye të ndryshme u deformua dhe u mohua.
Baltosja në këtë rast është jo thjeshtë e pabazuar por është e dënuar moralisht dhe ligjshmërisht. Dua tu bëj me dije se do të ndërmerren hapa ligjore për të bërë deri ën fund transparencë mbi shkaqet e këtij dezinformomi. Ngjarjet janë të qarta si drita e diellit. Ne e kemi referuar si vrasje me dashje.
S’ka lidhje me gjobvënien është konflikt i çastit”, tha Rrumbullaku
