RENEA ka arrestuar autorin e vrasjes së efektivit të FNSH-së, Ardian Kodra paraditën e sotme në Torovicë , Lezhë.
David Qosaj ishte mbyllur që prej drekës në banesën e tij në Torovicë, i armatosur dhe qëllonte në ajër duke kundërshtuar forcat e policisë.
Por, sipas burimeve, FNSH-të dhe Policia nuk kishin informacion të detajuar lidhur me profilin dhe rrezikshmërinë e autorit.
Gjatë operacionit për kapjen e Qosajt u vra efektivi Kodra, që u qëllua nga autori. Pas kësaj, u thirrën forcat RENEA nga Tirana që mbërritën rreth orës 17:15.
Pas mbërritjes, RENEA evakuoi zonën rreth banesës së Qosajt në Torovicë në rast rreziku. Snajperat u pozicionuan gati për qitje, mirëpo objektivi ishte fshehur në një dhomë ku RENEA nuk kishte fushëpamje.
Qosaj refuzonte negociatat dhe qëllonte vazhdimisht drejt RENEA-s. Kështu, ai tentoi madje që të arratisej, duke u përpjekur që t’i vinte zjarrin katit të dytë të banesës për të shpërqendruar Policinë.
Mirëpo, RENEA veproi me gaz lotsjellës fillimisht, dhe më pas hodhi një granatë “trullosëse”, për ta shpërqendruar autorin dhe për ta trullosur.
Pas këtij momenti, kanë ndërhyrë në banësë forcat RENEA dhe e kanë arrestuar autorin të gjallë. Mësohet se ai nuk ka marrë asnjë plumb dhe është në gjendje të mirë shëndetësore.
