Dhjetë vite nga vrasja e deputetit të socialist Fatmir Xhindi, djali i tij Anduel Xhindi, tashmë deputet në Kuvendin e Shqipërisë, ka rrëfyer për herë parë ndjesitë e mbrëmjes së 2 majit 2009.
Në intervistën e tij të parë mbi këtë ngjarje, në emisionin“Kjo Javë” në News24, djali i tij tregoi minutat e fundit me të atin, dhe se si mori vesh lajmin se babai i tij ndërroi jetë.
“Ka qenë nata më e vështirë e jetës sime. Gjatë gjithë ditës, kam qenë së bashku më tim atë, kemi përcjellë vëllain që studionte në Rumani, pastaj jemi kthyer në Roskovec. Im atë e ka patur shumë pasion të punonte në fshatin e lindjes, dhe ka vajtur në Kurjan, ku kishim një ullishte dhe rreth orës 20:45 është kthyer në shtëpi dhe kemi marrë vesh lajmin e vrasjes së tij. Nuk ka patur asnjë lloj shqetësimi, me përjashtim të këtyre problemeve të punës, të zgjedhjeve, se ka qenë periudha para se të niste fushata zgjedhore asokohe. Nëse do kishte ndonjë shqetësim, ndoshta s’mund të ma kishte thënë mua, po nuk do shkonte në fshat vetëm. Mund të merrte shoferin edhe çdokënd aty nëse do ndjente diçka”, ka treguar Anduel Xhindi.
Anduel Xhindi ka thënë se i ati nuk ishte gjaknxehtë dhe se nuk kishte probleme personale me askënd. Ai u shpreh se tashmë familja ka shpresë te drejtësia e re, pasi në atë kohë edhe pse u premtua shumë asgjë nuk u bë për zbardhjen e ngjarjes.
“Qeveria e aso kohe i kishte të gjitha instrumentat. Nëse do të donte ta zbardhte e kishte zbardhur. Ne kemi qenë pak skeptik aso kohe, u dhanë shumë premtime u thanë shumë fjalë po edhe sot pas 10 vjetësh, absolutisht asnjë gjë. Nuk e di arsyen. Në bazë të informacioneve që kam unë, di që janë hequr të gjitha pistat, e vetmja që ka ngelur ka qenë pista politike”, ka thënë Anduel Xhindi, i cili sot mban vendin e të atit në Kuvendin e Shqipërisë./Opinion.al
